قصيدة للشاعر صباح الهلالي

[ملكة الاحساس]

بعد ماي الفرات لضيفنا نبدي ... و الگطان الازرگ ما نكر شصة

و كل اسباب جوعي بدون استثناء ... كلها تروح فدوة لورقة الحصة

گَبل خطار اجاني و صادفت عوز ... على خدودي شمع ذابت الگصة

و لان تنوري طين و غيرتة من الگاع ... خلص عدنة العجين استنسخ الگرصة

هسة شبينة ليش؟ و شختلف بالناس؟ ... اذا يلتفت ضيفك ينوكل نصة

اهلنا البيت واحد شو صفوا ضدين؟ ... ملة تلوم ملة و بالگلب غصة

اركض طاح اخوك بظهرة حط سجين .. لا غيرك يذبحة تفوتك الفرصة!

سكرانة العدالة و ناس تاكل ناس ... زمن صارت خوات العلوة و النصة

طم هور الچبايش و انفي كردستان ... و بگلب الرمادي خنجرك رصة

ولك مو عيب! و احنة اللي نشيل الراس ... شلون جفوفنا تگض راسنا تگصة؟؟؟

اختلفنا احنة بعلي و بعمر و بعثمان ... و لو يدري محمد بينا ما وصة

المحتل اطلعة حط ايديك وياي ... يا محتل طلع بالهوسة و الخبصة؟

گطرة حيا آنه و انت گصة

يعرفنا النشد عنة و التگصة

و لك احنة بجسم واحد و التگصة

چفك لا تظن گصيت ايدية

فدوة أرجوك تهدة و تلعن الشيطان ... عسا من غيراك ببختة و بحظة

آنة شردت منك غير ننسى الراح؟ ... و طرفك ع الزعل بيناتنا تغضة

انفطمنة على البنادق و انت تعرف زين ... الشُعيرة بلا نفع لو زعلت الفرضة

آنة و ياك سيف و نذبح الجلاد ... و اذا تعجز ايدينة بلوزتة نعضة

العباس جدنا الما احتاج چفوف ... ظل حد السنون اللازم القبضة

چا شنهي عليمن ليش مختلفين؟؟ ... انا شنهو القبلتة و انت الترفضة؟

يجوز الما اگضة الخلل بالچفين ... اليعبر علية چفوفك تگضة

انا غرگان يمك آني اخو عثمان ... اللي بجسر الائمة ما صفن لحظة

شاف الايد وحدة و ناس ضگها الماي ... و على گد الچفوف الطاحت تشظى

أنا دجلة الخير الما نست عطشان ... و اخوي انت الفرات و ترضى ما ترضى

اختلفنا بأولياء الله و ضعنا

و احنا الساس للدنيا وضعنة

و ربك ما نغير ما نغير من وضعنة

شرط الا تحط ايدك بدية
للشاعر صباح الهلالي
اتمنى تعجبكم

[سلام الدراجي]

الله قصيده للشاعر صباح واعتقد فاز بها اول شكرا خيتي على النقل الرائع ياملكه

شكرا يا ملكه على هذا الذوق تستاهل هذه القصيده ان تنشر بروح طاهره
تحياتنا لشاعر المبدع الغنائي صباح الهلالي

[ملكة الاحساس]

شكرا على المرورو الشفاف يازير نورتي الموضوع زينة شكرا على مرورك