قصيدة لون الدم
يلون الدم
طويل الليل ونجومك
تطشهه الريح وترد بحفنتك تلتم
يلون الدم
عطر جرحك نداوه وغيث
وصبرك بالصبر يلهم
ابحر والدمع ربان
مرسيك عطش والصوم مايرحم
يمته رسومك الكاهن
مرايه الشوك شابت والهلاهل سم
الف نكلت جدم تاهت
ودليل العارفه توهم
تعـــــــــــــــــــــــــــــــــال
انطيني من لونك
اري اتبارك بجفك
كلشي بخاطري اتهدم
تعــــــــــــــــــــــــــــــال
ابعذرك اتحزم
ياطول الشمس طولك امس ذبحوه
واحبال المشانق سالفه بمأتم
كدرني اعله طولك ياعمر بحار
بتربك عطر مدفون
اريد بلا نفس اشتم
تعــــــــــــــــــــــــــــال
وحيلي طش ناره
نجم ينزف يضل ثاره
يشفه الجوع صالبهه
وبعدهي اتصيح بكتاره
يصوت وصرخه ماتهزم
بعدهي اكحيلتك تصهل
عشك والموت سماره
يلكتلي امس بالموت لاتهتم
لفني بحركت اصوابك
اخاف اصرخ وكولن باجر اتندم
على الحيطان ارسم صورتك ورده
وجنا وسمبله ومنجل
وشاطي بحبك متيم
واشيط بذكرك ورتاح
ونجن بالجنون احلم
وامل ذكراك حكلت عيد
مابلعت حزنهه
وخاطرك غيم
ومات الماي
وانت الجاي
واحضان الجروف كبور
من غيرك عمر مهجور
مامر اعله بابه النور
من كثر السوالف ليله يتألم
يريح بريح ماتصحه
ويليل اليطل بصبح
وعيون القوافي بسجتك مرسم
تعــــــــــــــــــــــــــال
ادروبك اتنطرك
صبح يالنسمتك بلسم
اكول المارهم يرهم
بيك سنيني تاذيني
جرح ما نشفه المرهم
احلف وقسم بجرحك
قسم ونفاسي ماتعلم
الفرح مفتاحه بجفوفك
وعيدي اهلاله بحروفك
يلون الدم
يلــــــــــــــــــــــــــون الـــــــــــــــــــــــدم
مع تحياتي
كريم السلطاني
من ديوان الجــــــــــــرح والرمــــــاد
رد مع اقتباس
رد: قصيدة لون الدم
