ابو ذيات روووووعة تعجبكم ولعيونكم

[عاشق عيونك]

يهل روحك عله الطيبات تربه
وعله دربك تظل العين تربه
ياريت اكعد عله مصلاك تربه
وابوسك من تحط كصتك عليه



بقه غامض سؤالي وياك منحل
وجسمي من السهر والليل منحل
ابشرك صرت بين الناس منحل
العسل حصتك وأنا اللسعات اليه



عساهه بكلب دنيانه وكلبين
اريد الهه جسم صاحي وكلبين
اشو الحلوات شافني وكلبن
يجوز من الكبر بين عليه



كلبي صار بسمك يعني مالك
وشنهو اللي بقالك عندي مالك
عشت بقصر حبك وانته مالك
ورضيت بجورك وضلمك عليه



علي يالطلك الدنيا ومردها
اجيتك والمرض روحي مردها
امد ايدي على شباجك مردها
بجاه حسين مد ايدك عليه



احس حلوات خزرني وفاتن
وحسنهن يجذب الناظر وفاتن
حظي الماحوه مروه وفاتن
اخذني يكود بيه لجاسميه



عرفتك وعرفت لغزك وحلاك
وحق من جملك يسمر وحلاك
چذب من ايدي اهدنك واحلاك
لانك روح وفراكك منيه



قدر مكتوب حبك وانت قسمة
الواحد مالة ناتج من تقسمة
لون بسيوف كلبي من تقسمة
دشوف معزتك شنو مسوية بيه



حبيبي ارفع رصيدك من هوانه
شربح والله بحياته من هوانه
شتفرق منهو انته ومنهوانه
جن روحين وجتمعن سويه



يصاحب لاتظن مسرور بعداك
وعسى سم الزهر يندار بعداك
شيطفي الكلب من نار بعدك
يطفيها الوكت من ترد ليه



رمح جارح وكتنه خله بينه
ثبتنه وعيب بانت خله بينه
طبع احنه من ابونا خله بينه
نبيع ارواحنه ونحمي الخويه



فشك بارود وكتي ثار منك
واريد ابحيل اخذ ثار منك
مصايب وكتي كله ثار منك
تحشم بل الوكت وانته عليه



شما اكتب يظل اسمك على املاي
وقضيه انت اصبحت ليه وعلم لاي
منارة انت بوسط كلبي وعلم لاي
تظل عالي وترفرف بس عليه



أبد مازلزلك حالي وهدك
عفاه اشيحمل الكلفه وهدك
قصدي بس اصيدنك وهدك
واريد اتصير حر وترد إليه



سلطانك وصل للضيم خايب وصه بيه
انه بطيبي الصبي شاهد والصبيه
عابر سبيل احسبني ربك وصه بيه
وفك حبال ظيمك من اديه


تكل للناس عني انه ذاك
جنت بيه تتوسل انه ذاك
بعدني ولك خايب انه ذاك
اليشك حلوك لو طاح ابهبيه



انكتب حبك بنص الگلب كتبـــه
وصرت طالب وضاعن بيك كتبـــه
العبت اَنه بغرامك طـــره كتبـــه
ولا مره كسبت الداس ليــــه

[نسيت انساك]

الله الله كلمات غايه في الجمال تقبل
مروري

كلمات اكثر من رائعة عاشت الايادي واتمنى من شخصك الكريم ان نرى منك الكثير من اعمالك الجميلة تقبل تحياتي

[عاشق عيونك]

غيث..المحظوظ..منورين شكرا ع مروركم الرائع

تحياتي

[ام فيصل]

يهل روحك عله الطيبات تربه
وعله دربك تظل العين تربه
ياريت اكعد عله مصلاك تربه
وابوسك من تحط كصتك عليه

الله عليك وعلى هالأبوذيات الجميلة
والإحساس الرائع يالغالي
مشكور على هذا الإختيار والنقل المميز

تحياتي للعاشق

[عاشق عيونك]

شكرا أم فيصل الغالية
شكرا ع المرور

تحياتي

[حيدر القريشي]

احس حلوات خزرني وفاتن
وحسنهن يجذب الناظر وفاتن
حظي الماحوه مروه وفاتن
اخذني يكود بيه لجاسميه


حلوة عشوقي الغالي
على هذه الابيات الرائعه
تقبل تحياتي وتقديري
مع اطيب الامنيات

[عاشق عيونك]

حبيبي ابو كرار الورد نورت
شكرا ع مرورك العطر

تحياتي