رسمنالك عشگ مجنون

[علي عباس العبادي]

رسمنالك عشگ مجنون..
جاور ليلك .. النعسان
ورسمنالك عشگ تموز ...
من يحلم تلوح اشفاه گطرة ماي .. من نيسان
ورسمنالك .. حزن عاشور
بعيون الورد من ذبلاه الصيف ...ومات ابشّفة البستان
ورسمنالك جرح ... ياكل بروحه سنين
من طف كربله المانام ...حد اليوم
من رمح آل اميّه ... الشال راس حسين
من مگوار محسن ... من يهزه الغيض .. فوگ الطوب
من فزعة اهلنه ابثورة العشرين
من چان الشلب يعتاز ...ماي وطين
من شوگ الدلال الريحة الخطار
رسمنه جروحنه وجرحك دمع بالعين ..
وارموش الحزن خلينه لجله ادثار
هم نحتار.. لو شفنه الوطن ... مهمومه بيه ازغار
وهم نحتار ... لو شفنه الدرب مزروعه بيه اشواك
وبطول النفس تتناشق الأزهار
وهم نحتار .. لو نگطع رحمنه ابساعة الشدّات ...
وجار الما يحن للجار
بدفاتر شوگ ...
شگگها الوكت من حالف النسيان
رسمنه اچفوف دنيه ابلايه حنة .. فاو
عروس انزفت اعلى الموت ..
لا دگة طبل ... لا هلهلة نسوان
وزتينه الفرح وي خشبة التابوت
وبحلگ المگابر يصرخ النيشان ..
شجاها الناس ..
جف بيها العرگ ..والغيرة صارت عود ..يابس مثل غصن الياس ..
لوحرمو عليه الماي
وشجاها الناس ...حلفت بالنميمه ونكرت العباس
وضحكت للوكاحه ..ابعين صلفة شوف .. مامش خوف
من يرضع حلگهم كاس
وسفه وحيف ...يا وكت الكحيله الراح ويه الطيف ..
وبارود التفگ ضل يخنگ الترباس
وسفه وحيف ...
اطيور الهاجرن شجرة محنه وطيب
ردّن للأغصان ابجنح شايل فاس
واعيون الوكت نزعن بقايا الشوف.. معميات
يغفن يا هظيمه ابسطوة الحراس
والحد مانجمتك باگها الناطور
كترنه الشمس عن لا يمسها الليل
ويستاحش ظهرها وبالفياي اينام ..نوم اهل الكهف .. وادهور
وسدينا الصدگ عن لا تمره الناس ..
واتلطخه ابچذبها ... اموصخات الشور
مامعذور .. سيف النايم من اسنين عل الكلفات
واگرابه صبح مكسور
ما معذور .. چف الماينشف دمعة الحيران
وبساعة ظلامه اشموع كون ايدور
عدنه اقصور ...سكنتها الأشباح وصارت النه اگبور
وعدنه اعيون ... ضل بيها الدمع ملچوم .. حد اليوم
حد ما يطلع المظموم
وبسيف العداله ايگوم
وبسيف العداله ايگوم

[حيدر القريشي]

قصيده في غايه الروعه
سلمت يداك اخي العزيز
تقبل مني خالص الود والتقدير
مع ارق التحايا

[محمد السوداني]

قصيدة رائعه عاشت الايادي ابو حسين الورد

تقبل تحياتي

[سلام الدراجي]

قصيده في غايه الروعه اخي علي تسلم الايادي التي خطت هذه الكلمات بوركت