بعدعين العزيز

[علي عباس العبادي]

المگابر بالوطن مثل البساتين ...... لچن بيهه بشر مو نخل واعناب
مضيف انفتحت اتضيف المساكين ...... الدولبهم وكتهم بالف دولاب ؟؟
بقت بس الصور فوگ الحياطين ...... وأسف راعي الصور عن النضر غاب
أعتب عالمنيه التاخذ الزين ...... واعتب عالتراب الطم الاحباب
أليدفن عزيز ايرجعه امنين ...... أسألكم واريدن منكم اجواب
على فراگك دمع ما سالت العين ...... وحگ ملك الخذاك اتسيل تيزاب
أنه بعدك صفيت بنص سچاچين ...... تذبح بالدليل الجرحه ما طاب
والحملي بغيابك محد يعين ...... الحمل هدني ودليلي امنلحزن شاب
تعال وأحسب اشگد بي نياشين ...... خدي امنلطم لتيه الاحساب
سليت بغيابك سل مساجين ...... عن لمت أهلهم عمر غياب
الصخر فطرته صدگ من الونين ..... وبچو لمصابي بعدك حتى الاجناب
مثلك ألگه أنه ابيا كتر وين ...... يا طيب قليل المثلك اطياب
تمنيتك ترد يالغايب سنين ..... وبعينك تشوف اشصابني امصاب
أبوس الباب بعدك چن مجانين ...... لأن طبعات چفك لسه عالباب
وما غمضن اعيون وأحلف ايمين ...... ألگلك يغمضن هذا چذاب
وميبطلن دمعهن ذني الاثنين ...... أله اني ابلحد وعليه الاتراب

منقول

[حيدر القريشي]

قصيدة رائعه ومميزة
شكرا لك اخي العزيز على النقل المميز
وعلى الاختيار الجميل
مع ارق التحايا

[محمد السوداني]

قصيدة رائعة وتحمل الكثير من المعاني الموجعه
عاشت الايادي لهذا الانتقاء الاكثر من رائع

تقبل تحياتي وتقديري