لا تبجي على عمرك والعوض بالجاي

[وردة بغداد]

لا تبچي اعله عمرك والعوض بالجاي ..
شوف الدنيا هاي .. شبيها مابيها ..
گبلك هم بچيت .. وأيست مرات ..
بس شفت الدمع ميفيد تاليها ..
المرّن بيك كلهن .. هم اجن وياي ..
ونيران البگلبي .. ابدمعي اطفيها ..
أنه هواي البگلبي .. وياما شفت هموم ..
وبعض من السوالف خايف احچيها ..
عوف الماضي والله وداعتك ميفيد ..
شكثر گبلك بچوا والحزن غاطيها ؟!
وافتح باب گلبك للجديد وعيش ..
وادموعك لوكت العازة خليها ..
ميلوگ البچي لعيونك الحلوات ..
وحرامات الدموع الانته تبچيها ..
يل ما جربت بالدنيا مره اتعيش ..
وجبت عمرك حزن وهموم گاضيها ..
تعال وياي أورجك وانت عاين زين ..
وانثرلك همومي وانت ساويها ..
مخازن جوه گلبي من الهموم اشكال ..
واكابر على همومي ابضحكة اغطيها ..
اطلع وامشي واضحك واليصير يصير ..
واذا خايف الناس .. الناس شعليها ؟
ابدأ من جديد وسوي كلشي تريد ..
حياتك انت حر اشلون تبنيها ..
ولا يهمك حچي ولا تاخذ اللي يگول ..
عوف الروح تختار اللي يرضيها ..
القسه وي روحه ظالم .. وانت ابو الاحساس ..
معقوله القساوه البيك خافيها

منقول

[الشاعر ماجد الدعمي]

وردة بغداد
شكرا للقصيده الجميله ولجهودك المميزه
وفعلا يجب ان لا نلتفت للماضي
تحياتي لك

[وردة بغداد]

تسلم علمرورك منور الصفحة

[محمد السوداني]

قصيدة جميلة سلمت اناملك اخت وردة بغداد
دمتي بهذا التمييز

تقبلي تحياتي وتقديري

[ام فيصل]

تعال وياي أورجك وانت عاين زين ..
وانثرلك همومي وانت ساويها ..
مخازن جوه گلبي من الهموم اشكال ..
واكابر على همومي ابضحكة اغطيها ..

شكرا لك ولهذا التميز والإبداع في الإختيار
كلمات رائعة عزيزتي ومعاني جميلة
سلمت يداك التي خطت هذه الحروف
تحياتي لوردة بغداد

[وردة بغداد]

تسلمون علمرور

منورين الصفحة بردودكم يا طيبين

ماشاء الله
قصيده رائعه جدا
احسنت الاختيار
في امان الله