عيونك والدرب

[الشاعر ماجد الدعمي]

عيونك
والدرب
والليل
والاه
والصفنه الطويله الرافكت عمري
جبتهه وياك مثل خلك النواعير
لحد ما صفه مضرب مثل صبري
عيوني والدرب والليل
والاه
والفرحه البعتهه ودمعتي التجري
يسولفلي الدرب عنك عن خطوتك وين ؟
وانه الضاعن سنيني بجملة المدري !
ليغرك وانه والله كلشي ادري !
وساكت وشوسع صدري !
يمر صوت المراكب الكلشي جاب وياه
بس مركب حبيبي المبحر بصدري
وبس ضحكة حبيبي اضوي عين الليل
وبس صورة حبيبي العايشه بفكري !
يمر بيه الوكت وادريه عيب يعود
واليوم اليمر ميرد بعد ادري !
جا وينك والسنين تعاكبت والليل
خلف ليل فركه وعتني من زغري
جبتهه وياك سكته والدمع عنوان
والسكته الطويله التاكل بعمري
امر عاني اعله دربك
وجروحي مرايات
وضحكه بلا طعم وبخاطري تسري
من يوم الرحت والفرح راح وياك
ومن ترجع لزوما اوفي بنذري
وبعد تدري شنو نذري !!
واكتبلك قصيده والحبر ماي العين
واصرخ حيل بسمك
هل رجع عمري
هل رجع عمري


تحيات ماجد الشاعر 28 /12/2008

[ام فيصل]

يمر صوت المراكب الكلشي جاب وياه
بس مركب حبيبي المبحر بصدري
وبس ضحكة حبيبي اضوي عين الليل
وبس صورة حبيبي العايشه بفكري !


هنيئا لمن ابحر في قلبك يــاماجــد

وهنيئــا لصورته التـي تعيش في فكرك

صورة رائعـة صورتها لعاشقٍ اضناه البعد والسهر

ولا زال ينتظر شمس الغــد -- لازالت الذكريات تعبث فيه

فتضيع حروفه بين الحلم والواقع

احسنت -- ياصانع الكلمات

يامن تخجل الكلمات وهي تنساب بين سطورك احساسا

وشوقا -- وانتظــــار

[ابو علي الصكر]

الغالي ماجد الشاعر
ازهار واشواك
وفرح وحزن
وبستان وقحل
لا ادري اين اتجول
ولا ادري من اين اتيت وكيف ؟؟

ذهبت وكأنني رجل ارتفع لكبد السماء
لحنان القمر والشفق
لأرتوي من زخاتها العذب النديّ
اهل هي احرفك
ام مشاعرك التي انبتت مدينة كاملة..
قلمك ينثر مشاعر واحاسيس
ولك مني القرب..
صكر

[الشاعر ماجد الدعمي]

سيدتي الغاليه ام فيصل لك مني الشكر والاحترام فليس غريبا وانتي الفراشه التي تتجول على كل حقول الفرات وتحمل بين جناحيها عبق الكلمات . انا سعيد بردودك اختي الغالي وارى فيها شعرا واحساسا وذوقا كبيرا تحياتي ولك مني كل الاحترام / ماجد

[الشاعر ماجد الدعمي]

حبيبي ابو علي الغالي
تحياتي الكبيره لك وانت تضع بصمتك على مشاركتي
سعيد جدا بمرورك الكريم وكلماتك التي ارق من النسيم
شكرا لك حبيبي الغالي ودعواتي لك بالصحه والابداع الدائم تسلم حبيبي