شايفلك وطن

[هاشم نجم]

ها بويه الوطن بويه سلامات
اعزاز وبجالك احنه مو يتامه
يتامه الغادروك وراحوا اغراب
عزت روحهم رادوا سلامه
صدك ما سمعوا اصوات انفجارات
بس سمعوا حجي يهز الكرامه
ويا جرح العراق الماتشبهه اجروح
جرح من غيض روحه يشكك بروحه
ومن رادوه يطيب وشاف ذله يطيب
كام من الصبح وتريك ملوحه
يا هو اليشبهك وطن عباس
ومحد يشبه العباس غير روحه
انت اول جبل من ضعف بيه الحيل
رفضت عزته ينتجي على سفوحه
انت اول نهر ما يكدر السابوح
بيه غيرت الماي يشيل سابوحه
شايفلك وطن لمن يجيه العيد
عيديه الاحزان تصير مرجوحه
على احزانك عطوف وهي تنهش بيك
اذن بيبان كلبك جنه مفتوحه
كلبك كلب زينب ولو كله اجروح
شديت جرح غيره ونسيت اجروحه
شايفلك وطن لمن هله باكوه
ومو بالسر علن القصه مفضوحه
ما يقبل يكول انبكت كال انطيت
ذوله اولادي ومن روحي روحه
وطن صاير لخوته بالكرم جفين
كثر خيرهم بس كثروا نوحه
وطن رادوه يموت ورفض هيج يموت
حشم حيل روحه وجلب بروحه

للشاعر المبدع
علي سلمان غالي

[محمد السوداني]

وطن صاير لخوته بالكرم جفين
كثر خيرهم بس كثروا نوحه
وطن رادوه يموت ورفض هيج يموت
حشم حيل روحه وجلب بروحه

الله الله عاشت ايدك اخويه الغالي هاشم نجم
قصيدة موجعه جدا ولكن عل الجرح
تحياتي الك يلغالي

[هاشم نجم]

القصيده فعلا موجعه
شكرا لمرورك وتعليقك الرائع
مع اطيب التحيات

[حيدر اللامي]

عاشت ايدك اخويه الغالي هاشم نجم

[هاشم نجم]

وايدك اخي العزيز مغترب اوسلو
تحياتي لك
وشكرا لمرورك