وحدة العراق

[هاشم نجم]

غصن زيتون بيدي اشبيك شايل سيف
جريمه على البلابل سيفك اترفعه
كافي انزع قناعك حتى اصير وياك
واحذر بس ضميرك بالك اتنزعه
واذا اختك ولوها وانت بيدك سيف
ما ينهاب سيفك واختك امفرعه
بلبل كون اريدك ما اريدك بوم
البوم يحب الخرابه ويكره القلعه
امشنشل بيت اهلنه وبيه ضلعهم باب
واهل البيت ساسه وصعب ايشلعه
زعلانه النوارس جي تبدل الماي
وعلى خدود النوارس صافنه الدمعه
اتصالح وي ضميرك حطني عد يمناك
البسك تاج عز المحد ينزعه
بس الطوب يعرف قيمة المكوار
بخد الطوك للمكوار اشجم قطعه
تمثالين مكبل كون احط بالكون
واحد لبو الجون وواحد لفدعه
عثمان العبيدي الوكف التاريخ
بصينية القاسم جي وكف شمعه
لو يرهم نرجع المات رجعناه
وكل عثمان مثلك لازم نرجعه
يم عثمان كومي وهلهلي لعثمان
ضل ابنج السيف الذابح البدعه
سني وصار قائد موكب الثوار
شال كتابه رايه والكاظم اموقعه
جف الطائفيه تبوسه ذيج الناس
ولد الملحه احنه السانا تكطعه
اذا دمعه على خد اطفال كردستان
الجنوب يمسي بيه ويمسح الدمعه
واذا الانبار صاحت وين اهل ذي قار
حتى بالكماط يكوم للفزعه
احصائية الارامل بالعراق اهواي
عشرة اتزوجن واترملن تسعه
عراقك بيه علي وعباس واهل البيت
سبعه على الارض بس رفعو السبعه
العراق اخر نبي من انبياء الله
اذن بغداد ترهم للوطن بقعه
هضيمه نعيش فقره واحنه اهل الخير
واجفوف اليهود ابخيرنا امشرعه
هي فزعة ضمائر للعراق اليوم
لو يفزع ضميرك لو انت امشيعه



بقلم
الشاعر المبدع علي الناصري


(مفقود)

[محمد السوداني]

الله الله قصيدة رائعة جدا بوركت اخي العزيز
هاشم سلمت يداك وادم لنا حضورك الكريم

مع تقديري

[عاشق عيونك]

--------------------------------------------------------------------------------

غصن زيتون بيدي اشبيك شايل سيف
جريمه على البلابل سيفك اترفعه
كافي انزع قناعك حتى اصير وياك
واحذر بس ضميرك بالك اتنزعه


يسلموعزيزي هاشم ورد




تحياتي

[ام فيصل]

هضيمه نعيش فقره واحنه اهل الخير
واجفوف اليهود ابخيرنا امشرعه
هي فزعة ضمائر للعراق اليوم
لو يفزع ضميرك لو انت امشيعه

اختيار رائع عزيزي هاشم

سلمت يداك التي نقلت لنا مأساة الوطن

عثمــا ن وعلي ايد بإيد متصافين

(( لعن الله من اشعل النار وايقظ الفتنه ))


تحياتي لك

[وفاء سلطان]

الله الله
الله
كلمات رائعه

ونقل اروع

تحياتي لمجهودك الكريم...

[هاشم نجم]

شكرا لمرورك يا محمد السوداني وهذا من ذوقك

[هاشم نجم]

شكرا لكما يا عاشق عيونك ووفاء سلطان لمروركما وتقبلا تحياتي ودمتما بخيروصحه وعافيه

[هاشم نجم]

يشرفني مرورك اختي العزيزه ام فيصل
وهذا من ذوقج وتقبلي تحياتي