قصيدة العراق للشاعر سمير صبيح

[عبد الكريم البصري]

يريدونك تضيع وانتة نور بليل *** وتموت من العطش يالماي يردونك

ويضيعونك عجيب وانتة مثل الريح *** وين بيا مكان اتضيع يلكونك

مشوك بدرب ما مات جدمك بيه *** وحتى اتضيع كلش شدو اعيونك

وغشو عينك وايدك مزنجلة ومجتوف *** تهد هدة اسد لو ناس ينخونك

يل المغفي الجمر منقلة وبيك اتنام *** وهمة رماد موكة ما يجوونك

اذا ضيمك طلعته وظل وراك ايحوم *** ابد لتخاف منهم ما يظلمونك

عاشرنة التعب والاه والحرمان *** كلها لخاطرك ولخاطر اعيونك

صرنالك جسر للنجم عبرناك *** وصغنة من الحزن ضحكات لعيونك

تعلكنة قطع سودة وعليها ارواح *** ما جنة قطع لا كحله لعيونك

يردونك صبخ والملح ياكل بيك *** ويردونك تبور وما يزرعونك

ويردونك تجف والماي يطلب ماي *** ويردونك تنام وما يندهونك

ما يدرون عركك بالارض ميموت *** ترد تحيه وتعيش شما يكطعونك

ذاك حسين حي وصير انتة مثل حسين *** بالشدة الخريطة اتصير ميمونك

يااااا مدري شوصفك شرد اكولن بيك *** عراق والعمر ما يسوة من دونك

ليلى انتة صرت والمثل ما ينقاس *** وشعبك من محبتك صار مجنونك

[ام فيصل]

ما يدرون عركك بالارض ميموت *** ترد تحيه وتعيش شما يكطعونك

صح لسانك يالبصري ولسان الشاعر المبدع سمير صبيح

قصيدة في غاية الروعة -- وصفت الوضع واتقنت في وصفه

كل الشكــر لأختيارك المميــز

ودمت لنا عزيزي

[الشاعر ماجد الدعمي]

تسلم اخي عبد الكريم على هذه الرائعه للمبدع سمير صبيح
تحيه لك عبدالكريم وللحبيب ابو علي وتقبل مروري

ي

[محمد السوداني]

عاشت ايدك اخي العزيز قصيدة رائعة
تقبل تحياتي وشكري الجزيل