دارميات عن الوضع العراقي (ع الجرح)

[رضوان النجفي]

دارميات عن الوضع العراقي

خاف أحچي ويكَولون سب الحكومه * كفاره يطّي النوب يرهن إهدومه

سولف يبعد إچلاي ويحلها حلال * إضبط إعصابك زين كون أنت رجال

ذب شصّك وبعدين تصفي القضيه * لو سجن سبع إسنين لو تطّي ديّه

مو شص وحكَ عيناك سلّيه ذبيت * خلي اليصير يصير خلي أهجم البيت

مرت علينه إسنين بس نسمع أخبار * بلكي إنقلاب إيصير والطاغي ينهار

ما قصّر الله إبهاي ودّه البطل بوش * داس إبطن صدام وتفلش الحوش

خابرت أمي إبساع يا يمه وينچ * باجر نرد للبيت خل تكّر عينچ

هلهلت يم الباب وإلتمت الناس * مبروك ألف عالخير راح إبن المداس

من غبشه كَبل الناس راحت على السوكَ * جابت حضن صمون عود إنّه ريّوكَ

شعلت بخور النوب وتبخر الدار * عام ونص إمتانين والقوري بالنار

أيست والأيام طالن عليها * وردت مثل ما چان تصفج بأديها

فرحتنه بالتغيير طلعت حلم نوم * مثل السراب وراح ما يبكَه للدوم

كَلنه الفرج والخير والحظ إجانه * مثل الي راد إكَرون كَصوا له إذانه

نفس الصفر والطاس ما بيّن الزين * بس رحمه مو ممنوع نبچي إعلى الحسين

كَالوا بعد سنتين ونوزع إبيوت * تاليها حتى المات ما عنده تابوت

كيّفنه كَلنه نصير مثل الإمارات * ماي وضوه وتبليط مو بس قرارت

حجّتهم إستقرار مامش بالبلاد * تانونه عشر إسنين ونضوي بغداد

ننتظر عشر إسنين نحمي إعلى جوله * نتعارك إعلى إبريج ما عدنه لوله

جا ولكم شتردون غير المسيرات * يتنفس الجوعان حي بعده ما مات

رحمه العلم سواه مجلسنه لونين * إقماشه من باريس وفلوسه بالدين

إمبارك وعالخير هاي العداله * صبح ومسه إيغنون عالبرتقاله

إلنوبه خاف التين من يسمع إيغار * وبساحة الفردوس يحتج على الصار

خل يحتج الرمان خل يحتج التين * مليوصه هيه وشاخ بالديره الكَطين

نومتنه هاي إهنا للچمري يهواي * لمن يرد إردود ويغرب الماي

[محمد السوداني]

كَالوا بعد سنتين ونوزع إبيوت * تاليها حتى المات ما عنده تابوت


حجّتهم إستقرار مامش بالبلاد * تانونه عشر إسنين ونضوي بغداد



والله عاشت ايدك انتقاء رائع حبي رضوان والله منور المنتدى
تقبل تحياتي وتقديري ,,,ننتظر منك المزيد
مع ارق التحايا

[رضوان النجفي]

فرحتنه بالتغيير طلعت حلم نوم * مثل السراب وراح ما يبكَه للدوم

كَلنه الفرج والخير والحظ إجانه * مثل الي راد إكَرون كَصوا له إذانه


مشكور لمرورك محمد السوداني

[ام فيصل]

عاشت ايدك يارضوان يانجفي

دارميات متناسقة على شكل قصيدة

حكت ونطقت بالحقيقة المرة

الصبر زيــن عزيزي ولو مليتوا الصبر

( ان موعدكم الصبح اليس الصبح بقريب ؟؟ )

الف شكر لهذا البوح الحزين

[اسدالعراقي]

شكرا خي رضوان النجفي
على الكلمات الجميلة والمميزة
وماكو اخي غير ننتظر رحمة الله

[حيدر القريشي]

الف شكر حبيبي رضوان
والله دارميات حلوه وروعه
تقبل تحياتي
والى مزيد من الابداع والتقدم

[سلام الدراجي]

رحمه العلم سواه مجلسنه لونين * إقماشه من باريس وفلوسه بالدين

تحياتي الك رضوان دارميات جدا روعه عاشت ايدك وبارك الله بك

[رضوان النجفي]

مشكور لكم جميعا على الردود الجميله
الله يقدرنا بأن نأتي بكل ما هو جميل