يعني إيه مونديال؟!
- يعني كورة يا حبيبي .. حاجة كدة زي الأهلي والزمالك بس على نظيف شوية!
- يعني ها نشوفها يا بابا في التليفزيون؟!
- لأ يا حبيبي؟!
- ليه يا بابا؟!
- عشان الماتشات مش ها تتذاع يا حبيبي؟!
- إزاي يا بابا ، مش التليفزيون بيذيع ماتشات الأهلي والزمالك؟!
- أه يا حبيبي .. بس مش ها يذيع ماتشات كاس العالم عشان سعرها غالي شوية!
- يعني الأهلي والزمالك ماتشاتهم بتتذاع بس عشان "رخيصة"؟!
- أيوة يا حبيبي .. تقريبا .. حاجة زي كدة!
- طب مش ها نشوف ماتشات كاس العالم يا بابا؟!
- ممكن يا حبيبي أبقى أخدك نشوفها على القهوة!
- مش إنت بتقولي يا بابا إن القعاد على القهوة حاجة وحشة؟!
- أيوة يا حبيبي .. بس عشان القهوة ها تذيع ماتشات كاس العالم!
- الله؟ يعني القهوة بتدفع تمن الماتشات .. والتليفزيون مش بيدفع؟!
- أيوة يابني .. كفاية أسئلة بقى!
- معلش يا بابا .. أصل دي أول كاس عالم أشوفها في حياتي.
- أنا عارف يا حبيبي .. إحنا بقى شوفنا ماتشات كاس العالم اللي فاتت كلها أيام لما كانت ببلاش!
- طب بابا .. هوة أبو تريكة ها يلعب في كاس العالم؟!
- لا يا حبيبي .. أبو تريكة في الدوري بس!
- إللي ببلاش؟!
- بالضبط كدة!
- أمال كاس العالم فيه مين ها يلعب؟
- فيه لعيبة كتير : رونالدينيو ، رونالدو ، هنري ، زيدان ، بالاك ، توتي ، ميسي .. وغيرهم!
- وكل دول ها نشوفهم على القهوة؟!
- إن شاء الله يا حبيبي.
- طب بابا؟ هوة لو ماما عاوزة تشوف معانا الماتشات بتاعت كاس العالم ، ينفع تقعد معانا على القهوة؟!
- ممممممممم ... ينفع يا حبيبي!
- بابا؟!
- نعم!
- أنا باحب القهوة قوي!
رد مع اقتباس
