اكضي الليل وكفه شطوله صار الليل

ومادنكت راسي ورحت حاجيته!!

جنت بالبيت عايش بس جنت مرتاح

هسه البيت خايف يكعد ابيته

تعبت العيون ابكثر ماتانيت

وتابوت البواجي بدمع دكيته

عمر خلصته صاعد عالنخل ناطور

صرت اعيون كلي وكلي تانيته!!

((طلع البدر علينا))

صح شفت البدر بس بدر بيد الليل

بس ايريد يريد ترك حريته

ابكيف الليل تطلع جاشني اشسويت

ظل الليل يحكم شني السويته

كتله صوتي الك ولساني مو وياك

الشاعر مستحيل ايبيع قافيته

توه الساني خضر عمره خمس اسنين

خمس اسنين عمره وينهجم بيته

الحاكم كون يكعد واليتامه اتنام

مفروض اليتامه اتصير شعبيته

الحاكم مو ابقلعه ابنص صريفه ايعيش

الحاكم لوفقير الفقره حاميته

الابس زي معمم عنه قاري اهواي

عرفت اعمامته وحللت خاجيته

شرعية المعمم مو من الخضراء

المعمم بس علي الكرار شرعيته

المثلك مون يسال ليش ضدي الليل

وكف ضدي لان نجمات بجيته

المثلك مايحب الخارطه البطول

يحب بس الطرف والطرف سبيته

المثلك كون يسال عالفقير اشبيه

ضدك ليش جي مايوم حبيته

شني ذنب الفقير ايريد بس يرتاح

لايرتاح بس ترتاح بسطيته؟؟؟

الجسر خلص حياته اعله النهر خيال

طيحت الجسر بس بقت قدسيته

صوج اجتافي هاي السوتك خيال

وكبل لاتصعد انه الفرس وصيته

ماشايف كلتله وكتله راح ايشوف

خله ايشوف بلكي انشوف تاليته

مامستعد اكتل جندي راد ايعيش

واشوف ادموع عوزه ابوجه بيريته

بكد ادموع دجله احساب عندي وياك

ويجي اليوم الاكلك شفت صفيته

كتلك كوم حجب فرعوا بغداد

زيج البصره بيدك ليش شكيته

شط العرب تدري اعله العرب زعلان

يمك بالجذب مارحت راضيته

تره السياب ابنهه وهوه راعي البيت

الخيام اشعليه للبصره دزيته

وعلى مود النفط يتفلش السياب

لوبيدي النفط والكعبه سديته

العراق بكبره كلك كوم للحدباء

امس ذب الاعكال ولبس بيريته

امس دمعاته طاحن فوك خد اربيل

وخد اربيل كردستان سابيته

يكضي الليل باجر بس ولا احاجيك

صوجي الليل الك بليل وديته

عمره خلصته اتاني وهم اتاني اردود

موفوك النخل يانخل كصيته!!!!