تكلي اكتب عل غزل عن البنات ... يا ترافة تريدهة بشعري تبات
تكلي شعرك ليش اهات ودموع ... انت حقك ما شفت خط الشروع
انت ساعة س تعرفهة شتلوع ... الغاية تعرفهة تعرف الهاونات
شعري فك عينة لكة كبالة نطاق ... وبندقية وسفري وحب العراق
حبلة وحدة والمواعيد التحاق ... وجان موعدهم يتم بالعارضات
شعري شاف الموت ما شاف الورود ... لا بنفسج لا اغاني ولا وعود
الشاف ذولة كبالة يكتب عل خدود ... شاف بعيونة التعوق والي مات
هناك عدي عيون ضلت ما تنام ... حتى يبقى براحتة يطير الحمام
هناك عل ساتر عشت قصة غرام ... جنت عاشق راجمة من الراجمات
خلى اسولفلك بعد عن الحصار ... والدمار الصار ما بعدة دمار
ليل بغداد القصف سوا نهار ... وخدج اطفالي انتهو بالحاضنات
وشرد اغازل جارتي ام ثوب الوحيد ... تكلبة خاطر ثوبهة يبين جديد
تنتبهلى البالهة بالهم شريد ... اخدود صفرة شلون اكول موردات
مرة كلتلهة احبج شو بجت ... وانه خايف اخاف روحى تجاوزت
تبجي اثاري الحصة عدهة اتأخرت ...
انسة يا حب عوفني يا ذكريات ... تريد اكتبلك غزل والغي العناء
وانة عشر سنين كاضيهة حذاء ...هدومى طلبة وذاك من ذاك الشراء
فضل مني وعايش بهاي الحياة ...
انة ما احلم واحب اهوى بجنون ... قمة احلامي افصل بنطلون
انه لو مرتاح اكتب عل عيون ... وعل شفايف والجفون الناعسات
من الصبح لليل اركض عل الف ... بس طمامة وخبز ويخلص نتف
وانت مني تريد اكتب عل زلف ... شلون يمدح بالتراجي الغافيات
ويا علاقة اليوم ما بيهة دغش ... والعلاقة الطيبة تنشال بنعش
شتعتقد سوزان ترتاح لشلش ... لو دغش كشاخ وتحبة نجاة
عدنة ليلة تبيع بالوكفة دهن ... وقيس حمال يجت بس عل بطن
من سألت جوليت كالت بالسجن ... روميو التعبان بايك كيبلات
خلي يكتبلك دمع عيني اليسيل ... عن بثينة وكتي يحجيلك قليل
عدهة ست اطفال صارو من جميل ... كلهم يجدون بالشارع حفات
منقول
للشاعر سمير صبيح