خبر عاجل . . . (بقلمي)

**سراب الماضي** · 06-07-2011

مجلس احكام عمري اليوم اصدر قرارة
خبر عاجل اسمعوه . . . أهم وآخر اخبارة

اسمع يكلبي انت ويعقلي
وانتو يا اعـظاء الادارة

اليوم اسقــــــطنا النظام
لا للظلم لا للظـــــــــلام

كلبي يالخالفت القواعد
اليوم حلتك عالتقاعد
واستلم عقلي الوزارة

انت للحب استسلمت
واحوالي اني تدهورت

بعت عمرك واشتريتة
وتعشمت بالما لكيتة
عفت جنتي وردت نارة

سنين عمرك ضيعتهة
واحلة ايامك ما عشتهة

حبيته لحد الجنون
وامشيت انت اعلى الضنون
افنيت عمرك بانتظارة

اسست دولة غرام
الهة قانون ونظام

عندك الحب اهم شي
وبحسن نية الدنية تمشي
ونسيت انك في مغارة

الحكم بيهة للاقوة
وناسهة لتحب ولتهوة

كلشي عدهم تغير
ومحد بغيرة يفكر
وحتة الجار ما يعرف اليوم جارة

انهارت يكلبي دولتك
وعن الحكم اني عزلتك

دستورك اليوم ماعاد ينفع
وبهالحكم مجلسنا اجمع
اتنحة واترك لعقلي الامارة

لملم يكلبي الي بقالك
وسوي التريدة والبدالك

تريد تحتج؟ روح احتج واعترض
تريد تموتني؟ عمي وكفة النبض
الموت مو هو الخسارة

الخسارة انك تعيش للما يقدرك
تمدلة روحك جسر, ولغيرك يعبرك

وانك تضحي بهالزمن
وتنطي وما تطلب ثمن
صدكني هاي اكبر خسارة

اسمع يعقلي وانتبه
ما اريدك تتيه وتشتبه

راح اسنلك قوانين جديدة
صارمة وجدا شديدة
عن الوهم ابعد واكسر جدارة

المشاعر صارت جريمة
والاحاسيس جنحة عظيمة

والحب اعتبرة بدعة
لازم توكفة وتردعة
وتفنيه وتشدد حصارة

ما اريدك مثل كلبي تصير
وللحب ما اريد تصبح اسير

ضاع هو لهالسبب
تيه وظل الدرب
وما عرف يمينة من يسارة

من الحب ياما تألم
يعقلي من درسه تعلم

لا تواسيه وتتبعة
ودربك لا لا تضيعة
هو اختار خل يتحمل خيارة

لا تضعف ولا تنكسر
ولا تأمن بجنس البشر

اليوم مو مثل الامس
كلمن يكول يانفسي يا نفس
وكلمن يحوز لخبزة نارة

ابني نفسك من جديد
احلم احلام تفيد

اترك الحب والخرافات
امحي ماضيك الي فات
وانهض وانكت غبارة

الفشل مو عيب بس عيب الخمول
انهض وانسة لا تصبح كسول

الفشل اصل النجاح
والتعب بعدة ارتياح
نافس وحارب فوز بجدارة

يا عقلي اليوم انت الرئيس
حلفتك بكل غالي ونفيس

لا تخطي خطوات الكلب
ولا تنحني دوم انتصب
وبالماضي لا تندفن ارجوك واهجر ديارة
*****************************************

طبعا القرار ما تنفذ وبعدة كلبي هو الي يقود زمام الامور ههههههه . . . أتمنة تنال اعجابكم ولتحرموني من ردودكم
ســــــــــــــــــــراب المـــــــــــاضي