مهرك ايه يا عروسه
*******
مهرك ايه يا عروسه ؟ مهرى كبير وغالى
عايزه مال يا عروسه؟ ولو مال الدنيا جالى
امال عايزه ايه يا عروسه؟
عايزه اللى اديله حبى
يداوى الجرح اللى فى قلبى
ويحقق اللى فى بالى
اللى فى بالك قوللنا عليه يمكن نقدر نوصلك ليه
عايزه شوية رمل من سينا ابوسه
عايزه اركب ويا حبيبى سفينه وعدى قنالى
عايزه اللى يمشى على الشوك ويدوسه
هو دا يبقى حبيبى الغالى
عايزه اشوف اليوم ده بفارغ الصبر
عايزه اللى يعوضنى سينين المر
عايزه اللى يقدم روحه عشانى
لاجل يعيش غيره على ارضه حر
هو ده يبقى حبيب القلب
هو دا يبقى حبيبى العمر
سته اكتوبر حققلك يا عروسه كل اللى بتتمنيه
رمل سينا آلاف بتبوسه ووطنا قناله رجعت ليه
وادى النصر جاى يا عروسه روحى يا حلوه قابليه
طب ياللا انصبوا الزينه زفونى من مينا لمينا
لفوا بيّ كل مدينه من السويس لآخر سينا
وقيدوا الشمعدان خلوا الفرحه فى كل مكان
دا السكه بقت أمان من يوم ما عدينا
مبروك عليكى يا عروستنا النهارده تمت فرحتنا
يا مصر يا غاليه علينا نفديكى بارواحنا وبحياتنا
*********
كتبت هذه الخاطره من 38 سنه
مع تحيتى وتقديرى
رد مع اقتباس