((اكتشفتك))
روح عني..
ياحسافه العمرضيعته بهواك!
ابتعد مني..
جنت أعمى وامشي متعلم وراك!
انته لوحة أمزيفة
انخدع كَلبي بمزادك واشتراك!
انته صياد ومراوغ
شاطر بنصب الشباك!
مثلت دور البراءة
وقشمرت كَلبي واجاك..
من بعيد الوجه يضحك!
ولو كَرب...يطلع كَفاك!
يلي زرعك من كَزاز
وتجرح اجفوف الحواك!
يلي طبعك كله نار!
وصارت أنفاسك هلاك!
مرقد الحب هدميتة
واصلبت روحي بسماك!
تيهتني بكَاع غربة!
وكَلبي ما يندل سواك!
كَطعتني بسيف جارح!
وتطلب اترجه شفاك!
نبتت بعيوني سهمك!
وجاي تنشدني اشعماك؟
حيرت دفاني بيهّ
بكل جرح ينزف لكَاك!
جنت ابيعن روحي لجلك
واشتري بعمري رضاك!
مادريت أقناع لابس
والغدر جنحة طواك!
اشكَد رسمتك في خيالي..
جنة..
وقصور..
وملاك؟
لحضه وإعصارك نسفني!
ضيعاني..
وضيعاك!
واكتشفتك...
:
اكتشفتك!
بعد ما فات الأوان!
واعرفت طبعك خيالي
ومالك بكَلبي مكان!
وعندي ماظل
كل خيار!
روح عني..
خلي دمعات الندم..
تنزل
شرار!
ابتعد مني..
يلي سيفك من ثلج!
أنيّ
أبقة نار!!
**********
مع تحياتي
جلال البطاط