بقلمي-متى تدري بعذاب الشوگ
-متى تدري بعذاب الشوگ-
متى تدري بعذاب الشوگ
يالشوگك سجين بصومعت ذاتك
متى دربك تعرفه اجدام
يالبدربك رمال مغطيه سچاتك
متى عينك تصد بالعين
يالتكتل كتل من تصد نظراتك
يالوجهك اغر چنه الگمر بالماي
ولتم السمچ ويبوس وجناتك
يالحچيك برائه بشفة الاطفال
چا شنهي البرائه بغير چلماتك
يالشعرك شمس حته بسواد الليل
وتغار الشمس من تشع خصلاتك
يالمحلي الغزل شنهو الغزل لولاك
صفصاف الغزل من غير ثمراتك
يالوصفك كلام مشفر ومسوح
يالمحد يفك بالوصف شفراتك
ما اللوم الشمس لو لبدت ويالغيم
مستحيه الشمس من نور وجناتك
ولا اللوم النده لو عانگ الصفصاف
مجبور النده بغياب ورداتك
يالصوتك رقيق برقة الانغام
ومجموعه البلابل چنها باصواتك
ياهرش الورد لمته الربيع يعود
اخافن ما تجي ولا نشم ورداتك
يالكلك حلو من الجدم للراس
وشهود بجمالك حته شماتك
ياكاس الموده والگلب عطشان
اخافنها تشح بشفافي گطراتك
مرخوص العطش بشفافي خله يجور
لابد ما تصب فد يوم مزناتك
ومرخوصه الليالي وخلها بيه تجور
لان لون الليالي بلون خصلاتك
متى ترجع تراه الشوگ
فرعن بالگلب يالوهم جياتك
يااه بكثر ما گالت العشاگ
يريتك بالگلب وتشوف اهاتك
انه بحبك گضيت وگبلاني الشوگ
تعال ابچي چذب ما اريد دمعاتك
تعال وسكت الحساد والشمات
باچر هل الشماته تصير شماتك
لافجرك طلع لافاد ليلي شموع
ولا مرن حلم بالعتمه نجماتك
ياگطرت سراب بشفة العطشان
ادريها وهم واشربها گطراتك
لو مت بغرامك ما الوم الموت
ولا اللوم الگلب لتعنه سچاتك
ولا اللوم الجدم لو ضيع بممشاك
لان دربك طويل وعره طرقاتك
موصوچ الشمع لو ذاب صوچ الخيط
رغم ما محترگ ومضوي ليلاتك
يلوموني بهواك وگلبي من ابعيد
سلم قلعته من شاف راياتك
سچاچين الذبح تبرالك وي العين
وياهو الي يشوفك ينچلب شاتك
متى تدري بعذاب الشوگ
يالشوگك سجين بصومعت ذاتك
كلمات
ناصر اسماعيل الموزاني
رد مع اقتباس
رد: بقلمي-متى تدري بعذاب الشوگ
المشاركة الأصلية كتبت بواسطة سامي المشكور
