نـــــدَّه ... للشاعر حميد حسين كعيد*
**
آنه إعله دربك ورد وعيوني إلك بابين
باب إعله خيط الشمس..
وباب لضوه النجمين
حلمان بيك أشكثر وأتنطرَّك للحين ..
حلمان أشوفك ولو..
گطرة نده تلالي إعله ورگة تين
مبخوت أضوگك عالبعُد.. وأفطمَّلك الشفتين
بس خايف يبوگك صبح من ضحكة ال بلعين
وأبقه أدوِّر بالنظر عالباقي منك وين؟
إحسِّبني صُبيَّرة ولك..
جِّس عودي گبل الطين
مو حايل بروحي العطش ..
حايل صُفالي إسنين
مُرّني غيمة سفر.. وأحَسِّبها إلك جيَّة حنين
لا يا ولك، هلبّت تحِّن وتلين..
مو راحن واجَّن ورگات البساتين
وآنه ألولي إعله الجرح وأنطرلَّك الوكتين
أتمنَّه يوم وترِّد.. وإنشِّد سوَّه إجناحين
أتمنه أضمَّك يا حلو بين الضلوع وبين
بالگاع ما لك مدى ..
طوف بحنايه الصدر، وألعَب على الكترين
يالصاير إجناح الگلب .. وبيدك يظل دم الشرايين
تآخذ وتطي ويَّه النبُض ومورِّد الخدين
ويالصاير أنته .. أنه
وننشاف چنَّه إثنين
ونبضي إعله نبضك يدِّگ ماينجسِّم نصيَّن
ماينجسِّم نصيَّن..
...
من ديوان مرايات
...
رد مع اقتباس
رد: نـــــدَّه ... للشاعر حميد حسين كعيد*
