نســــــــــــــــــــــــــوان

نسوان

يا نسمة حياتي..
ويا أرق إنسان
هيچي ابكل سهولة …اتغيرچ النسوان ؟

أودّيلچ رسائل …
كلها آه وشوگ..
وارسمها إلعِيونچ …باجمل الألوان..!

تتغنى بجمالچ..
وبدلال البيچ..
وتفوح ابقصايد..ما لفظها السان!

واشكيلچ عذابي …
ولوعتي بفركاچ..
واهاتي اببِعادچ..تشتعل نيران!

وانتظرچ... كحل
وعيوني تحلم بيچ!
ودموعي الغزيرة..اتغرِّك الوديان..

إذا متصدّگيني...
لسلسلة حمرين..
إسألي ،...
و سرچنار وجبل "بازايان"!

إسأَلت عنّچ أهلها..
وفاح ذكرچ هيل..!
والنّرجس إبعطرچ..منتشي وسكران!

والريح التِّهب..
تحمل صفات إلبيچ..!
وبنيروز..باسمچ كل جبل حلمان..!

يتمنَّى الجبل.. أسمچ يِشِع بيه نور
ويرسمچ "سَحَر"..
بجبال كردستان..!

يا أوَّل عشگ
ذوّبَني بالآهات..
يا آخر فرح!... بگليبي الحزنان..

خلّيني أعْلَه بالچ...
مثل ماخليچ
نغمة اتهز كياني..
وتدحر النسيان..!

فدوة اتروح لاسمچ...
كل بنات الناس!
- يا "سوسو" الفرح - …
والزلم... والنسوان!