نبدي من الصفر -على العراق بين الدبلوماسيه والواقع المرير

هانت ياوطن ذيج الليالي السود
نبدي من الصفر والهمه غايتنه
شما يكثر ذبح تدمير ارهاب
نصبر عالجره باحزان عبرتنه
العراق يكوم باجر يابو الكومات
شما توكع تظل بحار روجتنه
جثيره اهموم شايل ياعراق الخير
وجيرانك زهت بخيرات خبزتنه
موعجيبه الوطن اغصانك تطيح
بس عجيبه الساسه تنهش بلحمتنه
ومو عجيبه الوطن خيراتك تشيح
بس حيف عله النخل ينظر الدمعتنه
انهض ياشعب وشوف التفاهات
من طاح الصنم لليوم عركتنه
خلي انكول ماضي بفترة الطغيان
والطاغي بمزابل راح شوفتنه
وكبل جانت عصابه مسدده البيبان
رفيق وبعثي سنين حكمتنه
ليش اليوم ظلمه وصفنة اكبور
وليش المعترك مازال دفنتنه
طلايب عالحكم بظل انتخابات
ننتخب ياكتله تنهض بنهضتنه
واخبرك يامواطن وانظر للوضع واختار
ولاتنظر رموز وصور هوستنه
وموكلمن لبس هندام تمشي عليه
ولاقوط الوكت هاليوم تحكمنه
------****-----*****--
كتبت يوم 15-6-2010
الكعبي

[ام فيصل]

صح لسانك عزيزي
لوحة مرسومة بألم وحسرة
وطن جريح ,,,, وشعب صابر

اسأل الله ان يكشف هذه الغمة عن هذا الوطن السامي بأهله
وان يعم الأمن والأمان بحكومة تنظر بعين الرحمة اليه

سلم لنا مدادك
وننتظر جديدك القادم

تحياتي للكعبي

[السومري71]

الله الله عليك ايها المبدع
قصيدة وصفت جرح العراق بمعنى الكلمة
كل الشكر لك على هذا القلم النابض بحب العراق
خالص تحياتي

السلام عليكم
اخي سامي الكعبي
دام ابداعك
دعائي لك بالتوفيق
تمنياتي لك بالخير والسلامه