سنين يوسف

أحلم بيك ليلي .. وكل صباح ألگاك..

ناطر تنتظرني ... وأفرح ابملگاك...

يا شدَّة ورد.. بالنادي عطرك فاح...

ليـْتـَيـْهـَك أكيد إبْريحتك يلگاك

&&&

صار إسنين مجدب ...ونـته زخَّة غيم ...

روَّت عطش روحي...وچنت عمري أرجاك !

مثل إسنين يوسف.. عشت سبع إسنين ...

متَّصله .. وعجاف . . ومظلمه .. ابلياك..

لمن شفت وجهك .. شع سماي ابنور

ونهمرت غيومي ... ودارت الأفلاك..!!

&&&

گلّي امنين إجيت..؟ وچنت غايب وين..؟

وبنظرة عـِيونك ورَّطت مضناك..!

ريت الخلَّه خدَّك.. يحوي نار ونور

والخلاني أعشگك ..بالعشگ يبلاك ..

أني إسنين عمري إتعدت الخمسين ...

وإنت إبعز شبابك .. گلّي شحچي وياك ... !؟

&&&

ساحرني ابدلالك.. والحنان البيك ...

وعيونك سبتني ... ويسرتي ابيمناك

أشمَّك رازقي..ايفوح ابهداوة ليل

ويحير الورد... من تخطر ابممشاك ..!!

&&&

يا نغمة فرح ... ونعزفت اعله اوتار -

- گلبي ... وظل وريدي إيردد ابذكراك..

خل تمضي السنين ... وتنتهي الأيام ...

ويدور الزمان ... وأظل عمري أهواك

لا.. لتگلّي تنسى ... .. وهاي نزوة تروح ...!

أنسى الناس كلها ... ولا تظن أنساك ...

خلّيني أعلى بالك.. مثل ما خلّيك ..

ذكرى اتهز كياني...

وعايش ابطرواك...!!