ابن آدم يگضي عمره بتيه غافلْ
يركض بس يدوّر عالملذات
واحد همّهْ يلهث عالدنانير
مَ تهمهْ القيم ما تردعه الذات
اليهمه حفنة فلوس بمظاريف
وإذا يعدهن تظنه يقرأ آيات
واذا عن المبادئ تحچي وياه
يصيّح لك مبادئكم تفاهات
وواحد مو مهم بجيبه لفلوس
المهم عنده يدور عالوجاهات
وثالث لو تدور وين تلگاه
تلگاه بحضن ذيچ القذارات
كل همه الغريزة ويگضي أوطار
عقل عنده وتصنفه ويه البهيمات
ورابع بالموائد فكره مشغول
بس أشّر يجيك بْلا عناءات
بس شوفه الطعام اشكال والوان
وخل يتشمم اصناف الحلاوات
يزحف لك زحِف ويقبل ايديك
وقسم بالذلة يعلن لك ولاءات
واذا نخلي بحچينه شوية إنصاف
ونتوخّى الحقايق والصراحات
صنِف بالناس تلگاه طبعه مرغوب
وحتماً ينوصف بارقى العبارات
لسانه يصونه ما يحچي على الناس
ولا ينجرف وَيْ موج الحماقات
ولا عمره يخون بنظرة عيون
شريف وما عرف طعم الخيانات
ولا يفرّط حشاه بوصل لرحام
ولا يمضي بعمل قصد المراءات
وإذا أمّنْتَ سرك وامّنت بيه
تلگاه هو مستودع أمانات
المهم عنده رضا المعبود ويخاف
إذا فد يوم ظهرت منه زلات
هذوله اصناف وانت اختار شتريد
ضميرك حي أظنه وبعده ما مات
وعقلك لو تخيره تشوفه ميزان
وما ظن يغرگ ابّحر الخرافات
خيرتك واظن الباقي وياك
وانت اختار من بين الخيارات
مع خالص التحايا