ابوذيات جميله جدا

اريد احلف ما ارجع لبيتك ولاعود
جكارة مابقت عندي ولاعود
كمان المايسليني ولاعود
وجاي انت تضحك علية



على ضيم الهوى ياروح علمي
وبيها ارفعت اني اليوم علمي
اسالتها المستوى وتكول علمي
بخامس باء يالتسأل عليه



أزعل يا وطن وارجع اراضيك
وحن بغربتي لناسك واراضيك
بغير الفرح صدك ما ارى ضيك
واذا ًمَرك حزن احسّه بيه

بيك الطيب والزينات وفرات
يمن مايك عذب يازين وفرات
دجلتك وانته خويه صرت وفرات
وبكرمه علي نصبح سويه

مو مرة ولا مرتين مرات
احاچيك وترد زعلان مرات
ضوگني هواك سنين مرات
وهذاك انت العزيز اتظل عليه

طحت ولاحيل بية انهض ولاگوم
ولاخوان وگفولي ولا گوم
ولاني صلح وي دنياي ولا گوم
اراضيهة وترد تزعل علية

جمعلة اچم فلس بيها تراها
أعمه الگلب بس عينه تراها
ثروه بدون طيب وحب تراها
مذله وفگر واجيب الأذيه

نفسك دوم حاسبهه ولمه
تره من ايدك مسرتهه والمهه
حقير الي حرص عالدنيه والمهه
وغني الينفع برزق بلا شجيه

هلا بجيتك ياروح الروح يمنه
يمن وصلك لعند القلب يمنه
انجان تريد دار وتحط يمنا
يادارك بالعيون تصير هيه

گلبي ياوطن حبك والك راد
ومل من كثرة فرا گك والك راد
احب الشيعه والسنه والاكراد
وحبك ياوطن واجب عليه

أياك ثم أياك وياك
من صاحب ضحك بالجذب وياك
يجمع حطب وبالنار يريد وياك
يضحك معاك والعلة خفية

أحب ابلادي ماحبن بلادين
كافر ولنكر دينه بلادين
انه ماامد ايدي بالغربه بلادين
أخاف الغربه تاخذ حتى اديه

متى اهلال السعد بالعز يهلنه
وزمان الشوم بالغربه ياهلنه
والله لمن اذكركم يـــــهلنه
تشب وتنطفي النيران بيه

[امير الاحزان:]

احسنت اخي
باقة رائعة من الابوذيات وان كان في بعضها
طالما قرئناه وسمعناه على منتدياتنا
الا انها تستوقفنا عندها لنتسمرها
تحياتي

[الشاعركريم السلطاني]

اخي المحظوظ اتمنى ان تكتب عليها منقولة الانها ابو ذيات قديمة ومطروقة
ولاكنك لو
م تنقل قفل البيت الاول صحيح السلطاني

[عتابي]

الوكت سويته حرمه وشيليته
وبدي كارة مذله شيليته
أخو الجبته جاري شيليته
طلع علاس ويدلي عليه

شكرا على الابوذيات الجميلة وتقبل مني اجمل وارق التحايا