ارصفت الشوارع.... حيدر الربيعي

ارصفت الشوارع

ـــــــــــــــــــــــــــــــــ

كون بلا حجي ندكابل انة وياك
بعيوني السوالف كلهن اشرحهن

وسولفلك عليك اشكد اسولف بيك
كبل لا جنت اعرفك بية اسولفهن

سواليفك حفظ ماتنكتب بقلام
على خطوط الجفن برموشي كاتبهن


كبل يومين اعرفك مو كبل سنتين
وكبل سنتين جن عيونك اعرفهن



سامع بالسوالف تنحجي وتنكال
بس بيك السوالف سكتة سامعهن

بوكت الجاهلية اشعار كتبو بيك
ولعيونك بوكتك صرت شاعرهن


كومت امهات بعينك مخلفات
وانة الامهاتك صرت جاهلهن



سر بية شوف عينك زال لو ينكال
ماسولف بعينك خاف اخسرهن


راح وياي اسولف على عيونك هاي
اصلي اعلة الرسول نخاف نحسدهن



حضنك بية ربيع وهم شتة الامطار
وهم صيف وخريف بوكت جامعهن


صدرك بية مناهج تشرح التاريخ
وانة بشفتي يوم بيوم اراجعهن


اية ايريد ربك زرع بيك اشكال
شلع زرعات جنتة وبيك زارعهن



ارصفت الشوارع جلبن برجليك
وجف رجلك عليهن صار شارعهن




مو بس الرصيف ايباوع الرجليك
الشارع سوة عين وكام باوعهن


اتلاثة بهل السماءيضون اعلة الناس
وخيط الفجر انتة وصرت رابعهن


اعتباطا ماعرفهة انيوتن الافكار
من فكرة جمالك هوة طلعهن

ليش الضوء اسرع منطلق بالكون ؟
شافك راد يلحكك صار اسرعهن

كل هذا وسؤالك ليش افكر بيك
ما فكر ؟ افكاري شلون اجرعهن

تعال ارجوك صدك وشلتهة الروح
الموانع ذني بيني وبينك ارفعهن




تعال وياي اكعد بقن بس جم يوم
وهذن جم يوم اذا ماجيت اودعهن

وهذن جم يوم.... اذا ماجيت اودعهن



تلميذكم

حيدر الربيعي

[سلام الدراجي]

عمي حيدر والله اتمنى اكتب مثل هاي القصيده
رائعه بكل معنى الكلمه كلها صور جميله
والله احتاريت يابيت اخذ منه
مبروك عليك الابداع اخي العزيز
كل عام وانت بخير
انت اكتب وانا اتعلم منك
تحياتي وتقديري

العفو حبيبي الغالي الدراجي سلام
انا تلميذ في روضة الشعر الشعبي وليس بمدرسة الشعر الشعبي
تحياتي لك اخي العزيز