ومضات عراقية
للشاعر غالب امعلا الحيدري
(1)
أباوع بالوجوه ...
أمزنجره من الظيم
بس وجهك أشوفه يلالي بشمسه
تعبني الصبر ...
والحزن بيه جبال
وجبال الحزن بالروح منغرسه
طايح من أمس لليوم ...
وعيون الشماته بحالي متونسه
أوديلك جرح ...
ما نزف دم والله
ظل ينزف صبر حد ماكطع نفسه
(2)
من تزعل ...
أحس الكون زعلان
وعيون الشمس ما بيهه أي ومضه
ومن تزعل ...
تون كل العصافير
ويكوم الحزن من عدهه يتشظه
يا نبع الورد ...
يا دمع آه و آه
يا دجله و فرات بطوله وبعرضه
(3)
ﭽويني بجمر ...
اذبحني بموس
ﮔص لوزة محبتك من شراييني
ﭽتفني بحزن ...
وقيود من هموم
وحافي أعلى الكزاز بألم مشيني
ذوبني شمع ...
بدموع من تيزاب
واحرﮔني حركك بس لا تعاديني
(4)
اشجرني حطب ...
خليني بتنور
واخبزني بمحبتك خبز جوعانين
وﭽملني صبر ...
لو صبري ايعوز
يل صبرك بحر مابيه غرﮔانين
ويل جرحك شمس
ينزف محبه ونور
واعداء الشمس اعتقد خسرانين
للشاعر غالب امعلا الحيدري