نشف دمعي//غزل...مع تحياتي للجميع
((نشف دمعي))
اصيرلك هدف وارميني بسهامك
واذا تخطي الكَلب مزَك شراييني..
خليني بكَبر بس لاتسد الباب
اريد بوحشتي تسمع صدى اونيني!!
سويني جمر والكَلب اشعلة ابنار
مثل عود البخور اتهب رياحيني..
يالبحرك ضوة ومشحوفي صار الليل
تيهني الضباب وانتة ناسيني..
على افراشي اشوفن صورتك نعسان
اخاف ارمش تروح الصورة من عيني!!
ياريشة جنح واتمنة اطيرن بيك
لو ريشي انهلس شلي بجناحيني..؟
اريدنك جرح يركَص على الآهات
تعذيبك عسل والآه تشفيني..
تمنيتك جمر وسط الضلوع اتنام
اصيرلك فراشة ابنارك اجويني..
لو نسمة برد مرت عليك ابليل
اوجن واشتعل جانون تلكَيني..
جنت صابر عليك اتسلى بالدمعات
مو دمعي نشف شنهي اليسليني؟؟
*****************
مع تحياتي
الشاعــــــــــــــــــر
جلال البطاط
رد مع اقتباس