لا تغرك سكتي

[هاشم نجم]

يلما الك جذر لا تزعل وي الريح
اخافنك بهويه وتنشلع---- سكته
طيح على الهوى وحب ايده من يغتاض
خاوي انت ---وبعد ما بيك كل عته
تضحك يخايب علي وانا بعلو الغيم
على دموع الفرح هم تضحك النكته
يبو جناح الشمع متعلي وين تريد؟
تدك باب الشمس جنك غشيم انته
ويبو اسنون الخشب لا تعض جف النار
طفي اسنين الخشب لو ذبته--- وكته
ويبو زنود الرمل لاتلاوي زند الشيب
وعناكيد الصخر--- كبلك عدن تحته
على الماي الضحل يتونس التمساح
ويفرح بالوحل---- لمن يمد خشته
وعلى موت الشمس يتنومس الخفاش
وعلى الهندس اهدومه عيب ماخذته
المبرد صح خشن وناعم اخدود السيف
لجن ياهو الركاب --الشكلت بذمته
يبو درزن وجوه- استهلكن بالثوب
وعلى باب الخجل بأخر وجه عفته
بعد مالك عيون--- وتنكسر باللوم
ولاعندك وجه--- حتى تعرك كصته
صحيح انت ضخم بس مو ضخامة روح
ضخامة كركدن-- بلوه ابتله بجثته
الكمكم صحيح جبير ولته لاذت بيه
لجن غصبن يدنك راسه ---لدلته
وصحيح السيسبان يلوذ بيه الياس
لجن ياهو صواني العرس عزمته
وصحيح الاثل عالي وفيه فوك التين
لجن ياهو الجفوف-- اتوسلت سلته
وصحيح الجوري نام يم الصفصاف
لجن ياهو الخشوم --تعنت لشمته
دخان المزابل--- يطم عين الكون
لجن عود البخور الحلفو ابخته
ود العامري ارهه من ابو الحسنين
لجن ياهو المذنب ---يلوذ بكصته
وياهو اللي ضربته تعادله بصفين
وياهو اللي على الصراطيعبر بذمته
الفراش يطير مفرد والجراد اسراب
لجن ياهو الحدائق تحتفي-- بلمته
فوك من الخشم متعلي عرش العين
لجن تصرخ دمع لو سمعت بطكته
مترهي الجبل بس ما تعرفه بيوم
ولاشالت خشمهاعلى السفح قمته
لا تغرك سكتي-- كون خلكي يطول
البحر يكتل بصوته ويرهب بصمته
ولا يغرك مجانك كون عالي تصير
اشما يعلى النخل ينشف كبل وكته
ولا تغرك فرصتك كون سهله تصير
العلاس ابن عمي الما حفظ عمته
ابن عمي صدك --لاجن خانت بيه
اذا ذيب بن خالي اشترجه ببن اخته
علي دله الحرامي وجابه نص الليل
اجه وياه يتختل---- نمت كل ظنته
على الخيبه يتشلبه ظنته نيت سوء
وحسباله يحوف وبعد يترس الشمته
ويه اول جدم --انا صحت ياهم ذول
ويه لمضت زمرهن من طحت صبته
استخطيت بن عمي وادري بيه علاس
محد كاللي ------بعين الظهر شفته
لا تعتب يكلبي----- ولا تجثر اللوم
كلمن طينته----- وكلمن لبن درته
يوم الشبح -----متعدي من ابعيد
وانت بسهم حقدك من بعد صبته
صبته بلا عرف وبلاعداوه وياك
لمن ما كرب ----لنه الشبح انته
يا عدوة مرض تنتشر مثل الريح
حتى انته ---ابد ما سلم من انته

للشاعر المياحي

[الشاعر ماجد الدعمي]

الف تحيه لك اخي الكريم على الاختيار الجميل وشكرا لجهودك اخي هاشم
وعذرا القصيده للشاعر سعد محمد الحسن رئيس اتحاد شعراء ميسان وليس للمياحي
وتحياتي للمبدعين المياحي والحسن

[الشاعر ماجد الدعمي]

اخي الكريم هاشم اسف للعوده الثانيه ولكن هناك اخطاء املائيه او لغويه ارجو تصحيحها على النحو الاتي ولك تحياتي :


علي تضحك يخايب وانه علو الغيم
طفو سنين الخشب لو ذبلاه وكته
يبو زنود الرمل لتلاوي جف السيل
لجن ياهو الركاب انشكلت بذمته
يبو درزن اوجوه استهلكت بالسوم
الكمكم صح جبير ودلته لاذت بيه
صحيح الجوري نام بمنة الصفصاف
لجن ياهو اليلوذ المذنب بكبته
مترهي الجبل بس ماتعله بيوم
شما يعله النخل يشيص كبل وكته
عله الخيبه يتشلبه ظنته واطي السور


لك مني الف تحيه اخي الحبيب

[هاشم نجم]

شكرا لك حبيبي ماجد ولمرورك
وشكرا جزيلا للتصحيح واسم الشاعر
نورت صفحتي لك كل الود والمحبه
ودمت بحفظ الباري

[ام فيصل]

احسنت ياهاشم على هذا الإختيار الرائع

لك مني كل الشكر والتقدير

وتحياتي لك - وللشاعر الرائع سـعد محمد الحسن

وشكرا للرائع ماجد على مداخلته

[هاشم نجم]

شرفني مروركي اختي ام فيصل
وتحياتي الحاره لكي
ودمتي بالف خير

والله روعه وشكرااااااااااا على الامانه في النقل

[هاشم نجم]

شرفني مرورك اخي الكريم
قاسم الجبوري وردك الجميل
تقبل تحياتي وودي