خبر سار للعراقيين

[حسام صفاء]

السلام عليكم

شكري الجزيل الى كل من شارك بطرح وجهة نظره بشان هذا الموضوع

البعض يلوم العراقيين لان شاركو بالانتخابات و وصلوهم لهاي المراتب ..

عليكم السلام ..
اللوم والعتب ليس لمشاركة العراقيين ، بالتأكيد لا ، لكن اللوم والعتب لاختيارهم المفسدين والسراق وغير الكفوئين فهناك بون وفرق شاسع بين المشاركة وانتقاد من يشارك في الانتخابات وبين اختيار المفسدين ..
يعني لو انتخب المفسد لو يبقى الارهاب مستمر ؟؟!! لا يوجد ربط وتلازم فبما انني شاركت وانتخبت لماذا لا انتخب الوطني والنزيه والشريف بدلا من انتخاب من ندفع ثمن انتخابهم اليوم ؟؟!! أم ان العراق خلا من الشرفاء والابناء الوطنيين الكفوئيين ؟؟!!
البعض يبرر كما ذكرت سابقا ويقول وما ادراني ان من انتخبتهم ليسوا وطنيين والكل كان يصفق ويهوس ويدعوا لهم من مرجعية وشيوخ عشائر ووسائل اعلام .. وبالتأكيد هذا لا يبرر هذا الخطا الفادح حتى وان كان الامر صعب جدا لأن من يتكل على الاعلام والواجهات المصلحية فقط وفقط لا يصل الى نتيجة صالحة ولكن بما ان الله من على بني البشر بالعقل وميزهم عن البهائم لذا علينا ان نفعّل نعمة وجوهرة العقل ونميز من خلالها بين الوطني والشريف وبين المفسد وغير الكفوء وعلى جميع الاصعدة والمستويات من دون الاتكال فقط وفقط على الاعلام بمختلف توجهاته واشكاله ..
سلامي للجميع ونسأل الله ان يمن على العراق وشعبه بالأمن والخير ..

[ميراج]

اخ حسام صفاء انت شلون ميزت بين الوطني الشريف وبين الكذاب ؟
احنا 40 سنه دوله مغلقه مانعرف شي فجأة دخلو علينا ناس گالو الحل عدنا
زين بأول انتخابات ( على مستوى الجنوب والوسط ) فازو بدر وتفرعاتها ، بالانتخابات الثانيه بدر كل شي ما حصلو وصعد بدالهم تيار حزب الدعوه بالانتخابات الثالثه الدعوه ما حصلو شي وصعد تيار اياد علاوي واكثر الاصوات حصلها بالموصل وكربلا والبصره ، بس صار أتلاف بين تفرعات بدر والدعوه واخذو الوزارة
زين يعني انت هذا متعتبره وعي موجود بالشارع ؟ مو لان الناس انتخبو اياد علاوي لكن ب3 انتخابات جربنا الكل والكل طلعو فاشلين
بعدين ترى اكو شغلات ماتنحچي ، ولاتخلي ابالك ان اكو عراقي راح يجي وينشر العداله ترى هذا من سابع المستحيلات
لان اليوم العراق شأنا ام ابينا انقسم ذاتيا لاكثر من جهه
العداله تحقق بالعراق لمن الاغلبيه تحكم ، ومثل ما حكمتنا اقليه من سنة 1963 ولحد سقوط العراق جبناها اعدامات ومذابح وحروب اهليه داخليه غير معلنه لازم نجرب حكم الاكثريه والعداله راح تتحقق لمن النظام يرجع يصير جمهوري على اساس انتخاب كل 4 سنوات ، والعداله تتحقق لمن كل انسان عراقي يقتنع ان الله ماخلق البشر من عشر بطون وكلهم من بطن وحده وكلهم عدهم نفس العقل والفروق المذهبيه هاي مو مشكله
ولو هي تشكل مشكله عند البعض والدليل لمن وصل عبد الكريم قاسم اكو ناس راحو خلو ايدهم بيد الشيطان بس علمود هم يحكمون وفعلا حكمو 40 سنه واكثر بشرفك شنو اللي شفنا من 1963 ولحد الان ؟؟؟؟؟
ارجع واگول ان حكام اليوم ما يمثلون طائفه لان كل الطوائف مشاركه ، السلطه التنفيذيه بيد مذهب والتشريعيه بيد مذهب والقضائيه لاحول ولاقوه ، الجيش بيد مذهب والشرطه بيد مذهب والكل يعبثون لان ماكو مجال للاصلاح

بس ارجع وأسألك انت على أي اساس انتخبت ؟؟؟؟؟؟؟؟؟؟؟؟؟؟؟؟؟؟؟؟

[حسام صفاء]

لازم نجرب حكم الاكثريه والعداله راح تتحقق لمن النظام يرجع يصير جمهوري على اساس انتخاب كل 4 سنوات

وشني الي حصلناه من الاكثرية غير الأذى والحياة المريرة ؟؟ وبعدين اليوم على اساس نعيش في دولة ديمقراطية ومع ذلك دنشوف الرئيس نفسه ورئيس الوزراء كذلك ، وهذا يوضح كثير من الامور ومنها ان الدستور بالاصل ناقص وفاشل وما يمنع ان يصير الرئيس رئيسا لأكثر من مرة ان دعمه حزبه وكتلته السياسية .. وبالتالي فنحن نعيش في وهم وخيال الديمقراطية والاكثرية لأن هي السمجة خايسه من راسها يا بعد اخوك ..

[ميراج]

وشني الي حصلناه من الاكثرية غير الأذى والحياة المريرة ؟؟ وبعدين اليوم على اساس نعيش في دولة ديمقراطية ومع ذلك دنشوف الرئيس نفسه ورئيس الوزراء كذلك ، وهذا يوضح كثير من الامور ومنها ان الدستور بالاصل ناقص وفاشل وما يمنع ان يصير الرئيس رئيسا لأكثر من مرة ان دعمه حزبه وكتلته السياسية .. وبالتالي فنحن نعيش في وهم وخيال الديمقراطية والاكثرية لأن هي السمجة خايسه من راسها يا بعد اخوك ..

زين امنت بالله
والحل شنو ؟
ننتخب الوطني !!!!!!!!! هو اكو بالعراق وطني عگب الاربعين سنه
والاجو من الخارج حاقدين على الشعب كله صدق او لاتصدق لان يعتبرونا كلنا بعثيه

[حسام صفاء]

زين امنت بالله
والحل شنو ؟
ننتخب الوطني !!!!!!!!! هو اكو بالعراق وطني عگب الاربعين سنه
والاجو من الخارج حاقدين على الشعب كله صدق او لاتصدق لان يعتبرونا كلنا بعثيه

اي وداعتك كلام صحيح الجماعة يعتبرون العراقيين كلهم بعثية بل ازيد من ذلك يعني لو يعتبرونهم مثل البعثية فقط لكان الأمر احسن شوية لأن الكثير من البعثية اليوم يتمتعون بمناصب راقية وحياة سعيدة ، يعني الظاهر ان الجماعة يعتبرون العراقيين اسوء من البعثية فيتعاملون وي الشعب باستخفاف وتحقير وعدم احترام غريب عجيب .. لكن ان شاء الله تفرج ان كنا صادقين في التغيير اما بخصوص الوطنيين في العراق فموجودين بالتاكيد واتمنى ان لا تئيس يا بعد اخوك ترى هو الي يردون يوصلونا اله هو ان يجعلونا نئيس ونوصل الى نتيجة نعتقد من خلالها انعدام الوطني الغيور على العراق واهله .. خلينا نسأل الله في هذا الشهر الكريم ان يفرج علينا بحق محمد وآل محمد صلوات الله عليهم اجمعين تحياتي للجميع وصيام مقبول ان شاء الله

[ميراج]

اهلا وسهلا بيك اخ حسام صفاء