ياستار الطف واحفظ العالم
مابينه نشوف اجسام متوذرات
ونص لشه وقميص احفظنه يا راحم
ها صوت انفجار اسم الله يمه عليك
ولك كلبي تكطع وين اشوفنك
لاويت الحياة وزامطيت الضيم
تحزمت وكلتله انه الاكبرنك
لايمه دخيلك وانخه ابو الحسنين
بالعباس والكاظم احصننك
فرحتي وعزوتي وكل الحزن ينزاح
من تمرك علي بروحي اضمنك
اعكد شيلتي للزهره وام عباس
كون بخير يايمه يرجعنك
.....................................
ها صوت انفجار تهزهز الشباك
شالانه وركعنه شلون بالبره
ادري شلون نشرد يمه وين نروح
عيشتنه ييمه هل صفت مره
دخيلك يا محمد احفظ الاولاد
بجاهك يالرسول تزيح هل غبره
صبر ماظل ييمه ولا بكتلي عيون
ضغط عندي وقلب تعبانه فد مره
جبت هاي الامراض من الثمانينات
والتسعين عمر الاه والحسره
.....................................
ها صوت انفجار اسم الله يا ستار
شفت جيراني هسه تمشه للشارع
وشفت الناس تطلع للاشغال تروح
وابني شويه كبله بهل وكت طالع
ترجعلي ييمه وانته سالم كون
انذرلك كليبي كون بس راجع
.......................................
ها صوت انفجار وكاعد المسؤول
بس يعرف يصرح من على الشاشه
اعمالن جبانه ومن قبل اشرار
وللنار الشعب سووه مثل ماشه
هل متونس وكاعدلي بالخضراء
يصيبه الضيم لا يا سامعي حاشه
ها صوت انفجار ...............اسم الله يمه عليك
رد مع اقتباس