مساجله مع { مامرتاح } بقلمي
يالتنشد عليه وبين اديك ارماح
مامرتاح
كلشي انشوف بس حرنه ويه الناس
من صار البشر يلبس جلد تمساح
مامرتاح
لان طبع النذل من يغدر ايصيب
وصواب النذاله اجروحه ماتنزاح
مامرتاح
باكوني ابغفل وآنه الجنت ناطور
والحبه الدليل انكلب ضدي اسلاح
مامرتاح
خلوني اعله علوه وكامو ايصوبون
طحت اتباشرو شماتي كالو طاح
مامرتاح
من صاحب درب ناطرني ادير العين
حط خنجره ابظهري ودار ظهره وراح
مامرتاح
من منجل حصادي الصار بيد الغير
من سنبل امصوفر طشره المرواح
مامرتاح
غدروني الرفاكه وحملوني ابغيض
ماذكرو الطيبه وركضتي اعله الصاح
مامرتاح
من سم الجرعته وماجزه الزردوم
من جلمة نواعي ابشفة المداح
مامرتاح
من حال الوكت من دورة الايام
منشار الليالي وعمري صار الواح
مامرتاح
من عمري الكضيته اتعلعل ومرتاب
مثل خوف الذبيحه ابشوفة الذباح
مامرتاح
يالتنشد عليه وحالي الك مكشوف ؟؟
من هم الوكت ؟؟؟؟؟؟؟؟؟
من عصرة المعتاز ؟؟؟؟؟؟؟؟؟؟
من سدة البوب ؟؟؟؟؟؟؟؟؟؟؟؟
منين كلي ارتاح ؟؟؟؟!!!
مامرتاح !!!!
**********
*****************
رد مع اقتباس