زنجيل ابوذيه بلا بوش
وصدك فره الزمن بينه بلا بوش
تذكر جدك أيكلك بلا بووش
عميه أنگألت وصارت قضيه
وقضيتنه وطن مدمي سباني
وسمعه بصوته الأمريكي سباني
تدري استشهد أليمي سباني
وترك يمي قذيفة وبندقية
وبنادقنه تحب الفشك اصلي
وعلى اعدايه فشكنه أيريد اصلي
تعال أرجوك ساعدني اصل لي
ونرمي اثنينه بهل المدفعية
ونعمل للوطن كنه نعدله
والقتل شعبي بظلم شتظن نعدله
على المحتل فرض واجب نعدله
نعد أرجال ما تهاب المنية
نعد أرجال مرفوعة علمه
وتتحدى الذي يوصل علمه
محضره اجفونه وهذا علمه
ولا أتبالي ابد بالموت هيه
ولا أتبالي ابد بالموت لألا
وتضوي وجوهم بالليل لألا
فشكهم عل العدا من بعيد لألا
يلالي بلليل وزنادي بدية
يلالي بلليل وزنادي يهل هل
شبه بدر اليشك ضلمه يهل هلل
بعون الله النصر قادم يهل هل؟
تهل الله واكبر على الو طيه
تهل الله واكبر يا وطنه
والرايتنه النجم دنك وطنه
طوبه للعدا هزهم وطنه
يهز الكاك ونجوم الثرية
يهز الكاع وحتى أعدائه هدهه
وطيور النصر فوگ الغيم هدهه
إذا احجايه تخص زنجيلي هدهه
وأتقبل نقد رغما عليه
الدكتور
سلام الدراجي
رد مع اقتباس