[ صَــوُرً وُجٌروُحَ وُ ملحَ ]
الليل جامه
وشايف أنت الليل لوهدّ الكمر
وتنزف جروحي شبابيچ عله مودك
وشوگ وعيون ومطر.....
وين رايح؟
خشبة التابوت عميه
وانت بعيونك صور من ماي روحي
الموت مايقره الصور.......
الموت مايرهم عليك..
الموت من گد اليتامه
الراسمين عيونهم بالعيد بياعة قهر...
الموت لو سامع ضحكتك
چانزل ساجد يبوس چفوف اديك
الگبر مايعرف ترافه.....
الگبر لو شايف طعم شبگة زنودك
ماطبگ روحه عليك....
ولاكلت بخدودك سنون التراب.......
خدودك الچانت ضوه بوحشة صفنتي
شلون طفتهه السنين!!؟
وسدت بعينك ضواهه
وفتحت عله جروحي باب.....
وانت تدري
تعودن تلچمهن انت
وبعد مايرضن غريب يمر عليهن
جروحي كلش يستحن.......
يبچن بسكته
خاف واحد يخطف ويسمع بچيهن....
البارحه سولفنه بيك
آنه وجروحي وصورك والملح.....
وچانت اول ذكرى صوره ..
الصوره سألتني عليك
اتلعثمت بأول حرف من ردت أجاوب
ردت أنسيهه السؤال.......
ودرت ظهر الصوره بس شنهي بظهرهه!!
الصوره مطعونه برمح.....
رمح فرگاك بظهرهه
وتنزف الصوره غياب..
تكسر الخاطر مثل طفله يتيمه
تريد من عندي جواب......
وشرد أگلهه......
فلان بدل ثوبنه بثوب التراب!!؟؟
وصبرتهه....
وسكتت الصوره وبقه ينزف ظهرهه
وچنهه نامت
توهه نامت
شهگ بضلوعي جرح.....
أول جرح ...شايل طبع غيرة فلح ...
هيچ انه جرحي مچلب بحلگ الرمح.....
وعنك سألني.....
تحيرت بيناتهن صوره وجرح
وأتلعثمت بأول حرف نار وحچي.....
وظل الملح ياكل بروحي
وذبلت جروحي معاناة وبچي....
ليله مو ليله رهيبه عبريناهه نزيف وذكريات.....
وحشمّت حته القصايد
بلكي تفزعلي ولو ومضة حياة...
ياهي الاقراهه وتفك حزني عليك؟؟!!
اوراقي كلهن گلبّتهن مالگيت
شلون تطلع ضحكه من ورقة وفاة؟؟
وراحت وياك القصايد
والصور
والذكريات
وبقت بيه جروحي وچفوف الملح....
وعشت بالگوه بغيابك......
عشت ميّت
آنه وجروحي جرح ياكل جرح
منقول
رد مع اقتباس