شيكون ردك اذا ياصاحبي يسالوك
ياصاحبي..............كف بعد لاتسال اشلونك
وبحاي عندك علم وتشوفني اعيونك
لاتسال اعله الوضع عل صحة عل اخبار
واتركني في حالتي وخليك بظنونك
ياصاحبي.................
مابقت في خاطري احجايه
واتبسمرت كا الصنم كدام المرايه
هل هذا انه الذي؟؟؟
احلمت وتمنيت
وهل هذا اني الذي؟؟؟
حبيت ونحبيت
وهل مابقى من العمر
بس ذكريات وصور
عن عائلة وعن بيت.....
ياصاحبي........................
قصتي قصة نهر وعروك
جف ماي عمري وحزن
طوك اسنيني بطوك
تاخذني صفنه الكبل
ويهزني حيل الشوك
واحترك ياصاحبي
سعف..وكرب.. وعثوك
مطعون ياصاحبي ................
من اهلي من ناسي....
باكو اسنيني غفل
وسم داروا بكاسي
ماخلو من الفرح
دمعة بجفن مختنك
والحسرة بنفاسي
تسالني ياصاحبي.....
عن وطن .....ماكو وطن
عن غنى خنكو ياس
عن شعر وين الشعر
مسدود حلك الشعر
تفجر ابو نواس
كل الحدايق جمر.......
واحتارت الاشجار
بعين الفقير انكتب
يتوسل التجار
ياصاحبي ................
مابقى في خاطري خاطر
ومن كل حياتي المضت
في عيشتي مسافر
بكل سجه خطوة الم
وبكل محطة جنت
كلمة وقلم شاعر
لاتسال اشرجعك ياصاحبي
الهل حي
أشتاكيت شمس الظهر.....
تحركني أدور في
اشتاكيت كلي عطش
واتوسل من النهر...
بلكيض كطرة مي
ياصاحبي....................
دورت عن بوسه لشفافي
عن ريل شايل حمد
عن هزت أجفافي
عن مستحه أعله الكصص...
وعن دمعة نامت غفل
لهفة بجفن غافي
ياصاحبي.................... لاتسل .....؟
وأسال ضميرك أذا اقرب هلك خانوك
وللغربة ياصاحبي
بأبخس ثمن باعوك
شيكون ردك اذا
ياصاحبي يسألوك
شيكون ردك أذا ياصاحبي يسألوك
بقلمي الشاعر
يحيى الحميداوي
21-11-2010
رد مع اقتباس