امي بسنين العجاف
نكتفي بريحة حضنها..
ومن نجوع
تثرد الجوع بلبنها
ولو عطشنه
تعصر عيون العطش وتجيبه ماي
وتحلب الصيف وتشربنه ندا
وتطحن برحه صبرها
العوز وتسويه غدا
امي اخذ لونه الفرح من لونها
امي اخذ لونه الحزن من لونها
امي كاس ايامي حنظل..
شنته بليمونها
ترفع بجفها لواء اسمه الحنان
وكربة العباس ماي عيونها
مره حزنت ..
حيل حزنت..
لان خاصمنه الرغيف
نزل قرص الشمس حافي
تمدد بماعونها
من تسولف تمطر الدنيه دفو
ولو بجت تترس غطانه حمام
وتحط دمعتها مخده..
فقره ماعدنه سرير
من عصر تفرش جفنها
وتضم دمعتها ضوه يجيب الليالي
تستحي منه الحروب
الشجر ينزع ضحكته ويلبس ثياب الغروب
القذايف تعتنق دين الورد
العراق يصيح غطوني.. برد
النخل يقدم بصينيه عمره
ومن تهز كاروكنه تنام المجره ..
منقوول
اهدي هذه القصيده الى قلب امي والى قلوب كل الامهات
