والكعبة اكفر بيك
إذا حبك لفاني بضلمه هاي الليل
أضل وياك انه بليل ضلمتنه
تانيتك عمر وسنيني چأنت ظيم
ومن شفتك شفيت وشفت علتنه
انه ألچنت أدور أعليك عمري الضاع
باوع بس علينه ارجوك لو فتنه
ولان أنت أصبحت ضلي وأخاف أعليك
حاير يا الحبيب شلون إذا متنه
انه ألما صحيت ودوم فاقد بيك
بالكأس انه أشوفك دمعه شربتنه
ياريحه مسك والمسك حطك بيه
حتارينه بمسك لو بيك شمتنه
ياعيد اليتامى وفرحه امتانين
ياگاع العطاشه تأني مطرتنه
هاذا انه وأضل اتنطرك ملهوف
ياصدر الحنين عليك نومتنه
من انه أضمك مدري شفتك وين
كلك أنت شفه وأنت قبلتنه
وإذا انه تهت بجروحي صارت وين
أبنارك احترك يامحلى حركتنه
بس من أنظلم (والكعبة اكفر بيك )
من رمشك اعلگك شوف قسوتنه
بس انه انصحك بالعدل جر وياي
ولا اتجرب قسوتي وهاك بوستنه
وإذا أنت تكولن سادي انه وياك
مازوخي أصبحت وتريد مصتنه
تتمتع أعذبك وأنت تصرخ زيد
يااجمل عذاب وچأن لذتنه
ياسهري وعذابي وشربي تالي الليل
يااحلى القصايد هاي قصتنه
الدكتور
سلام الدراجي
