تعيش بداخلي
وساكـن بالعيون
وبروحـي تبات
اومانسيتك
ذرّيتك ملح يحركَـ بالجروح
وسلّمتك الكَلبي وأمّنيتك
زرعتك جـمر
بين ضلوعي لـهّاب
تـحت راسي امننام اتوسّديتك
كلت كَلبي الضنون
اوبـيّ وسواس
خفت لتضيع منـّي
اوچـتّفيتك
برموشي اوطبكَت إعليك الجفون
إعله غـفله
افتحت عيـني ومالكَيتك
مدري انته ضباب
ودفعتك ريح
مدري آنه
بضبابك تيّهيتك
مدري انته الضعت
والفلك يندار
مدري آنه..
امنديّه الضيّعيتك
مدري انته..
الصرت ماي اوتبدّيت
مدري آنه بدمع عيني البچيتك
عميت أشلون أشوفك
وين ألكَـاك
..
وبصفنت خيالـي إتْلمّسيتك
سرحت اوذكرياتك
سرحت اوياي
ولون ماريد شخصك ما اجيتك
جسد وبلايه روح
أمشـي عله الكَاع
سحل جابتني رجليّه
إعله بيتك
يم بابك طحت ماحرّكت إيد
عله صدرك تضمني إستاهديتك
ضنيتك تـحبني ..
توفـي وياي
وتكتلك شوغتك لوفاركَيتك
بعد مازلّت إجدامي
بدرب ضيج
وبعد لاطاح حـملي
ولانـخيتك
حسّبتك تـجازي الطيب بالطيب
عني تضم وجهك مادريتك
أثاري الچان بيـني اوبينك أوهام
تـهدّم بيـتي
ونـهدمت ثنيتك...
