بوس امي يا غيم ونگط الماي
على جفوف الادين الكبرتني
انه احتاجيتها من محد وياي
وروحي تضايقت متحملتني
مشيت ويا الربع ما فاد ممشاي
وصرت كلمه بحلگ صاحب سكتني
بعد لا ذيج تنفع لا بعد هاي
هاي وذيج بالهم حاوطتني
شگد انطيها فنتك هاي دنياي
واكلها انطيني فنتك ما نطتني
مدابج عالمتون وسحگ بجلاي
ماطول عليكم ملختني
وگفت يم المرايا وصحت بوياي
اني بعين عيني وما شفتني
طحت بس من طحت عافتني يمناي
وخانتني يسرتي ما ساعدتني
صحت يمه وگبل ماتوصل شفاي
لگيت امي ويا صوت الاه اجتني
گالت أأأآخ يمه وبجت وياي
وصرت دموعها بس ما بجتني
للشاعر ضياء الميالي
