ادخل واكتبلنا شنو اتفطرت اليوم ؟؟

السلام عليكم يافراتيين


من بين أهم الطقوس التي ترافق رمضان في العراق التفنن في الأكل والإكثار منه، سواء في البيوت التي لم تغير سنوات الحصار من عاداتها فيما يتعلق بأنواع المأكولات،
وهذا مادفعني الى وضع موضوع جديد وهو من حياتنا اليوميه
ومن خلاله:
اولا نطلع على فطور الاعضاء
وثانيا نكتسب خبرات في عمل بعض الاكلات الي منعرف نسويها

فكره الموضوع كل واحد يدخل يكتب شنو فطوره
بالنسبه للبنات ياريت لو يكتبون مقادير اكلاتهم الي مسويها بالفطور
اما الشباب مو مشكله بس يكولون شنو فطورهم بلكي يذكرونه باكلات جانت خافيه عنه
واني رح اكون اول وحده انزل اكلاتي الي طبختها يوم بيومه

ورح ابدي من اليوم الي هو ثاني ايام رمضان يوم الجمعه
اعتقد انه الجميع يحب ينوع بالفطور وميعتمد على نوع واحد او صنف واحد بالسفره الرمضانيه

اليوم اني سويت
الطبق الاول
الشوربه الي هي سيدة المائده
وشوربتي هي شوربه عدس مضافه الها كيس من شوربة ماجي الجاهزه للطعم طبعا
واكيد الكل يعرف طريقة عمل الشوربه فماكو داعي اكتب الطريقه

الطبق الثاني
هو تشريب اللحم
ومقاديري هي 5 قطع لحم عجل بالعظم
مع بصله كبيره مقطعه مكعبات
بطاطا عدد 3 مقطعه مكعبات
ثوم راس كامل
نومي بصره عدد 2
ملح
بهارات
الطريقه
نضع اللحم والبصل والبطاطا على النار مع قليل من الزيت واقلبهم جميعا الى ان تكتسب بعض اللون
ثم اضيف البهارات والنومي بصره والثوم والماء الكافي لملىء القدر واتركها على نار عاليه الى ان تغلي مره او اثنين
ثم اخفف النار الى اقل درجه واتركه لمده ساعه الى ساعتين حسب حجم قطع اللحم
واقوم بمراقبته بعد مرور هذه المدره اذا لزم الامر واحتاج الى ماء اضافي اضيف له الماء
واتركه ايضا على نار هادئه جدا
بعدها اضيف الملح واتركه قليلا على النار قبل ان ارفعه منه


الطبق الثالث
اليوم سويته هو سمك مشوي
وماكو داعي اكول طريقته لكن رح اكوللكم مقادير وطريقة الحشوه مالة السوك
وهي عباره عن تمر هند ممزوج مع ماء قليل ومصفى من النوى
مضاف اليه ثوم مدقوق وقليل من الملح
ندهن السمكه بهذه الخلطه وندخلها للفرن والف عافيه طعمها رووووعه

الطبق الرابع
هو تبسي البطاطا باللحم
مقاديره نصف كيلو بطاطا مهروسه
قيمه مثل قيمة الكبه يعني لحم وبصل وكرفس او معدنوس وتحمس في الزيت
ثم نفرش نصف كميه البطاطا في قالب الشوي بعد دهنه طبعا
ثم نضع الحشوه او القيمه فوق البطاطا المفروشه
ثم نقوم بفرش الطبقه الثانيه فوق الحشوه وطبعا هذه الخطوه صعبه نوعا ما لذلك اني اسويها قطع قطع واضعا فوق الحشوه ثم الصقها ببل ايدي بالمي وتعديلها فتصبح كأنها طبقه واحده
ثم اعمل صلصه من معجون الطماطه مع قليل من الماء وقليل من البهارات والملح والفلفل الاسود واصبها فوق الطبق
ثم ادخلها الفرن الى ان تنضج وتتماسك


اني ادري سويت هوايه اطباق لكن هذي عادتنه

الطبق الخامس
برغل تطبيق
يعني تمن برغل
وهو عباره عن برغل خشن جدا شكله مثل الحبيه تقريبا
انقعه في الماء لمده ربع ساعه
ثم احمس قليل من الشعريه في القدر واضيف لها بهارات البرياني
ثم اضيف ملعقه كبيره من معجون الطماطه
واحمسه معها
ثم اضيف البرغل واطبقه ثل تطبيق التمن تماما
بالاضافه الى اضافة قليل من الدارسين يعني فد نص ملعقه شاي دارسين
ومكعب ماجي واتركه على النار الى ان ينشف ثم نخفف النار ونتركه الى ان ينضج


لهنا خلصت الاطباق الرئيسيه

هسه نجي للزلاطه الي مستحيل نستغني عنها
وكذلك المخضر لان ابو علي يحب الخضره هوايه يعني مابين نعناع وريحان ومعدنوس وكراث
وطبعا اهم شي بالسفره الرمضانيه هو
التمر واللبن
وشربت نومي البصره
اما الحلويات فسويت ترايفل
وطريقته بسكت ماري او اي بست ابو ربع دينار :66 (72):
هههههههههه
نكسره في الطاسات
ونعمل كاستر ونصبه فوقه
ونتركه الى ان يبرد
ثم نعمل جيلي باللون الاحمر حتى تبين الطبقات عدنه
ونتركه الى ان يصبح دافيء قليلا ونصبه فوق الكاستر والبسكت
ونتركه في الثلاجه او على هواء الغرفه
بعدها قمت بتقطيع موزتين ورتبت قطع الموزعلى الجيلي
وهنا صار عندي اربع طبقات بألوان جذابه تفتح النفس

لهنا خلصت طبخاتي لليوم الجمعه
اتمنى اكون وفقت في الشرح
واي سؤال اني بالخدمه
وباجر حايره شسوي فطووووووووووور:66 (75):
تحياتي للجميع واتمنى اشوف تفاعلكم ويه الموضوع
حتى نثبته بشهر رمضان
ونستفاد منه كولنه

ههههههههههههههههه هذا كله فطور كم واحد انتم اوكي احنه فطورنه اليوم وهو السبت سئلت الوالده وقالت شوربه عدس وتمر ولبن وشرابت واني اصلا مااستغنى عنهن وبرياني وزلاطه والحجي بيتاتنه هو منو راح ياكل اشو اني بس شرابت وماي من الحر

اقتباس:

---

المشاركة الأصلية كتبت بواسطة الدم بيحن

ههههههههههههههههه هذا كله فطور كم واحد انتم اوكي احنه فطورنه اليوم وهو السبت سئلت الوالده وقالت شوربه عدس وتمر ولبن وشرابت واني اصلا مااستغنى عنهن وبرياني وزلاطه والحجي بيتاتنه هو منو راح ياكل اشو اني بس شرابت وماي من الحر

---

هههههههههههههه اي والله عزيزتي
واحنه عددنا 5 نفرات لكن عدنا خطار 3 نفرات صرنا 7
وخطارنا رح يبقى شهر رمضان كوله يمنه
بس احنه حتى لو ماعدنا خطار هم نسوي اكلات منوعه بالسفره
حبيبتي الدم بيحن منوره الموضوع والف عافيه فطوركم
لاتحرميني الطله الحلوه
تحياتي

السلام عليكم حبايبي الفراتيين
اكووووووووول اشو ماكو تفاعل ويه الموضوع
شنو مصايمين؟؟؟
يله اني العليه رح اسويه واتمنى اشوف تفاعلكم ويه ام علاوي
اليوم ثالث ايام رمضان المبارك

ورح اكوللكم شنو سويت فطور

اول طبق
هو شوربة كالعاده

وثاني طبق
دجاج مشوي بالفرن ومقاديره
دجاجه متوسطه
بطاطا عدد2
بصل عدد 2
ثوم راس مفرط يعني فد 6 الى 7 اسنان من الثوم كبيره
بيذنجان عدد1
طماطه عدد2
بهارات
هسه نجي للطريقه
طبعا الصبح انكع الدجاجه بمي وثوم وليمون وشطه وملح وبهارات برياني
واتركها لمدة 4 ساعات تقريبا
بعدها اقشر البطاطا والبيذنجان والبصل والطماطه واقطعهم مكعبات واخلطهم معا في كاسه ثم اضيف سنون الثوم واضيف لهم قليل من الزيت وبهارات البرياني وقليل من المعجون
بعدها احضر كيس الشوي واضع فيه قليل من طحين الصفر لكي لايلتصق به الدجاج والحشو بعدها افرغ الطحين من الكيس
ثم امليه بالحشو وقل لا ادخل الدجاجه بالكيس ادهنهاا بمعجون الطماطه وادهن بطنها بقليل من الفلفل الاسود والدارسين
وبدين ادخلها بالكيس واربط الكيس واخليه بصينيه الفرن وادخلها للفرن الحار جدا
وتبقى قرابة الساعتين بالفرن على درجه 200

هسه الطبق الثالث
برياني بس من غير دجاج
يعني تمن وعليه حشو
وطريقتي هي
اغسل التمن البسمتي واتركه ينقع لمدة ربع ساعه
بعدين اجيب قدر واخليه عالنار واخلي بيه زيت واضيف بهارت البرياني وقليل من الكركم وحبتين هيل وقليل من الدارسين واقليهم قليلا بالزيت
بعدين اضيف التمن المنقوع واغطيه بالماء المغلي واضيفله الملح ومكعب ماجي
واتركه الى ان ينضج
ثم اقوم بعمل الحشو
وهو عباره عن مكعبات من البطاطا مقليه
وشراثح من البصل المقلي
وشعريه وكشمش وبزاليا
اخلطهم جميعا بعد استواء كل واحد على حده
واضيفلهم قليل من البهارات والنومي بصره المطحون والملح وبعد نضوج التمن اقوم بصبه في صحن كبير ووضع الحشو فوقه واضع الدجاجه المشويه فوق الحشو

هسه نجي للطبق الرابع
تشريب اللحم بيني وبينكم تريدون الصراحه ؟؟ مطبخت تشريب جديده عندي من البارحه لان جنت طابخه هوايه واليوم طلعتها من الثلاجه وحميتها ههههههههههههههههه

وطبعا مننسى الزلاطات واللبن والرطب والشرابت اليوم سويت شربت برتقال وشربت نومي بصره
اما الحلويات اليوم سويت محلبي حسب الطلب ردت اسوي حلاوة حليب بس ابو علي مشتهي محلبي
فسويت شسوي مغلوبه على امري خخخخخخخخخ
حكم القوي ههههه

وانشالله اكون وفقت في شرح فطوري ووصفه

تحياتي للجميع

والله خيتي ام علاوي
اليوم فطرت مي وبيبسي
واكلت لفة كص
خخخخخخخخخخخخخ
بس البارحة اكلي دسم
نمت جفي
ههههههههه
تحياتي

عاشت ايدج
حبيبتي ام علاوي
على هذه الفكره
واني ايوم فطوري
هو:
شوربة عدس
صدور الدجاج مع البطاطس
وخبز تنور بيتنا شي مهم
والسلطه طبق رئيسي
والتمر تمر نخلتنا
والارز
ومرق البامياء
والخضورات
السوائل مثل
العصير والماء من غير الماء شصير بحال الصايم واللبن
وبسسسسسس
وفطورنا خفيف ولله لان محد ميشتهي ياكل اكثر شي سوائل

تحياتي

ههههههههههههههههههه انس احسنلك خلي اكلك خفايف علمود الريجيم
هههههههه
كل الشكر لك ياطيب على روعة المرور
تحياتي لك

العراقيه الف عافيه الفطور
بس مكتيلنه شنو مقاديركم وشلون تسوون فطوركم ؟؟؟
منوره الموضوع
قبلاتي للعراقيه

تسلمين ام علاوي
فطوركم ما شاء الله
يشبه برنامج فطوركم علينا .. :3:
ما يخلون شي ما يسووه
بالعافية وصيام مقبول علينا وعليكم ان شاء الله

اما اختك ام علي
كل يوم بالطبع لا تخلوا المائدة من طبقي التمن والمرق
عندي الصغيرة ( طيبه ) لو ما شافت تمن ومرق بالأكل
تسوي هووووسه بالبيت ( الحجي بيناتنا ) :66 (8):

اضافة طبعا الى اطباق الشوربة
طبق ( كبة موصلية )
او دجاج بالتنور ( مو كل يوم طبعا ) نعمله بالبيت
في حينها يكون التنور جاااهز للشوي ...
ومهعا .. بالطبع
دوووووووولكه لبن هاذ الشيء لا يمكن الاستغناء عنه اطلااااقا
طبق رقي ، طيق عنب ( لو توفر بالطبع )
يعني مو يومية ....
وآآآآني من كل هالأكل .. يادوب ثلاث او اربع ملاعق من الاكل بس ..
والباقي فطوووري كله على مي ولبن ورشوية وعنب
وبعدين العصاااير والببسي
الى ان يصير السحوووور ..
موضوع رائع والفكرة حلوة
تسلمين يا اختي يا اطيب ام علاوي
:66 (46):

ابو علي الرائع
فطور شهي والف عافيه ياخويه
وبالنسبه لفطورنه والله اسوي كومه شغلات وهم نص الاكل نخليه بالثلاجه
ربي يزقك ويخليك لاهل بيتك ويفرحك بطيوبه واخوانها
لاتحرمني هالاشراقه الجميله وياريت كل يوم تدخل وتكولنا شتفطرت
تحياتي للعائله والف تحيه لاخوي الغالي

اتفطرت على ماء ثم لبن وشويه تمر ثم جكاره جكاره جكاره وبلاخير قبل اشويه اكلت كاستر لان معدتي اليوم تعبانه
تحياتي ام علاوي اختي العزيزه

اقتباس:

---

المشاركة الأصلية كتبت بواسطة عاشق النساء

اتفطرت على ماء ثم لبن وشويه تمر ثم جكاره جكاره جكاره وبلاخير قبل اشويه اكلت كاستر لان معدتي اليوم تعبانه
تحياتي ام علاوي اختي العزيزه

---

يؤيؤيؤيؤيؤيؤ ليش هيج عاشق يمعود اكو واحد معدته تعبانه يفطر بجكاره ؟؟؟
اويلي على الجكاير الي حتموتكم ناقصين عمر
لاياخويه زعلتني والله
مااريد هيج تفطر انت صايم اليوم كوله تالي تفطر جكاره ولبن ومي؟؟؟
هاي وين صايره
على العموم اريد باجر تدخل وتفرحني وتكول تفطرت كومه شغلات
تحياتي للعاشق

السلام عليكم حبايب
اعذروني البارحه مكتبتلكم شنو سويت فطور
بس جانو عندي خطار ومدخلت للمنتدى
المهم خلي نعتبر البارحه استراحه هههههههههه
رح اكوللكم اليوم شنو سويت فطور
نبدي من البدايه
الي هو طبق الشوربه وطبعا اني لعبت نفسي منه يوميه روتين ههههههههههههههه
وثاني طبق مرق بانيه واتمناه كدامكم بس ريحته تجنن
طبعا هذا بمكان التشريب لان احنه نسوي تشريب بانيه
ثالث طبق هو الدووووووووووووووووووولمه اويلي يابه شكد اكلنه دووولمه ومشبعنه
مااعرف اليوم طلعت غير شكل ماادري ليش بس هالكد طلعت طيبه ؟؟؟ رهييييييييبه
شنو هاي شكد امدح بنفسي ههههههههههههههه
بس جديات طلعت حيييل طيبه
وحرامات مصورتها الكم
ومننسى اللبن والرطب
ونوعين شربت
واحد مال تفاح واللخ مال نومي بصره
ههههههههه
واحد من الشمال وواحد من الجنوب ههههههههه
واليوم سوينه تبوله بمكان الزلاطه
والحلويات حلاوه حليب واني قبل نزلت طريقتها بالمنتدى
اتمنى اكون وفقت في شرح فطوري
انتظر اشوف فطوركم
اشو محد ديكتبلنه شنو الفطور؟؟؟

شنو هاي اشو محد ديدخل ويكول شنو فطروه
رح ابطل مااحجيلكم