عتاب احباب

من ارشيف اوراقي القديمة جدا

.................................................. ......................

عاتبيت وجنت اظنّك...

طبعك امن اطباع اهلنه..

وشاربه من ماي هور....

وكَــتلك

كَــلوب الجنوب كَــلوب سِمْجه

وطيبه لاتعرف تلف ولا تدور

واسعة وكلش كبيرة....

تمرحب بصدكَـــانهه وكلمن يزور

وجاوبتني بكل صلافة

الحقد عند الناس قطرة

وحقـــد البكَـــلبي بحــــــور

وكَــــتلي

مومنكم تراني

لاشفت ( بردي ) ولاكَــّطت ( زور )

تندميت

اعتابي ماكان ابمحّله

ولاصديقي

الجنت متباهي بعشرته وبيهْ فخور

ومادريت

اهدومنه تبدل طبعنه

وبدلت ( المحمداوي ) بغير طور

ومادريت

ابن ( العمارة ) يعوف اهلهه

وينتسب لاهل القصور

اعله هونك لاتشيل الغيض

واسمع كل محاجينه

ظريف الطول من ينغر

يخربط كل موازينه

بعدنه احنه ذهب صافي

ولا مر الدغش بينه

وبعد كلمة ( علي ) وياالروح

لو بالقَسم حلفينه

وبعد ( طشت الصفر ) عدنه

يغّسل بيهْ لو خطار مر بينه

وبعد ( عصّابة ) امي تشوفهه اعله الراس

تسوه شما تحط زينه

وبعد ( طابكَــهه ) ماينمل

ولا ( رصّاعهه ) و ( الهيسه بْدهينه )

ولوّن تمدح اختنه تكَــول مثلتهه

( يحلوه وخبزج اعله الرد ... يانَصبه ويكسكينه )

هذوله احنه

مثل شمس الله ماننظم

ولا بيهْ عار ماضينه

ولادرنه الوجه للراد

عشرتنه ويخاوينه

ضخر وضماد للمجروح

واحنه ادواه وتسكينه

ولوّن مر بعسر وبضيج

احنه الفرج يلكَـــينه

هذوله احنه

ولوّن اتكَــول مومنكم

ولايرضيك طارينه

ولوّن اتكَــــول كَـــلبي اسود

ابد لاتنتسب لينه ....ابد لاتنتسب لينه

..........................................
ابو يقين

هذوله احنه

مثل شمس الله ماننظم

ولا بيهْ عار ماضينه

ولادرنه الوجه للراد

عشرتنه ويخاوينه

ضخر وضماد للمجروح

واحنه ادواه وتسكينه

ولوّن مر بعسر وبضيج

احنه الفرج يلكَـــينه

هذوله احنه

ولوّن اتكَــول مومنكم

ولايرضيك طارينه

ولوّن اتكَــــول كَـــلبي اسود

ابد لاتنتسب لينه ....ابد لاتنتسب لينه
عاشت ايدك ابو يقين قصيدة فعلا رائعة تقبل مروري

اتمنالكم التوفيق والابداع دائما
موفقين بإذن الله ... لكم مني أجمل تحية

تسلم ايدك على هذه القصيده الرائعه التي تذكرنا باهلنا وايامنه الحلو
وليهسه طبع اهلنه ابد ما تغير
ضل الديوان احله من الفضائيات
شحلاته بيه نتسمر

تقبل مروري اخي ابو يقين تحياتي وتقديري ودمت