علة الحيهم نشامة الوطن ربانة
اذا واحدنة ضيم ايصيب جيرانة
بعد هدة عراقي.. المنيطگ بركان
كبر الاطلســـــــي مايطفي نيرانة
ربينة ابيت واحد حظن واحد چان
لسة البيت واگف بامل ذكرانة
اول ماتطب للبيت ماكو ابواب
من سعف العراق البيت بيبانة
بنينة ابطيب اساسة وحاوطيناه شوگ
ذني اثار ادينة ابوجه حيطانة
كتبنة اهنا عمر وهنا علي وعباس
طب ال كربله والنجف تقرانة
اكلنة بزاد واحد من فرد ماعون
ماتاكل وحيد الوطن وصانة
گدما لمة حلوة من ايصير الزاد
هور وجبل يگعد ياكل ويانة
چن بيت ابوذية چان ذاك البيت
وبگاع العراق الوكت خطانة
اذا تفرز شطرعن شطر معنة ايروح
من نلتم فقط يكتمل معنانة
ممكن نختلف بس اختلاف اخوان
مانعرف اتبات گلوب زعلانة
لذلك حتة مانتفارگ اثبتهة
جماعية لگوهة گبور موتانة
الف بئسا لمن حاول يشب النار
او لوّن غايتة بالوان دخانة
ولف بئسا لمن حط بالشوارع موت
عله ظهرالجنايز جثث خلانة
طبوبينة رادو اعداء انصير
حتة البيت ذاك اتطيح عمدانة
وحگ نسر العراق العله البيريات
وبهيبة وگفتة ابوجه عدوانة
وحگ طبگة اجناحة الرجفت صوبين
بي يدرون اذا تنفتح جنحانة
علمنة الوطن غاية حياة الموت
وبجذع النخل بالحرب شدانة
وقسم وياه قسمنة من ايمسة الضيم
نمتد حدر جدمة ارواح يلكانة


:66 (46): :66 (46): :66 (46):
منقول

اي والله وصح السان اخ عمار
ويسلم يراع شاعرنه ايهاب المالكي
احسنت الاختيار وما تنقل لنا
من اشعار رائعه بحب الوطن
الف تحيه لك وبارك الله بك

قصيده غايه في الروعه
تسلم الايادي حبيبي عمار على الانتقاء المميز
شكرا لك على مجهودك ..وتقبل تحياتي

شكرا لك اخي وحبيبي الغالي سلام
يشرفني هذا التواجد الدائم منك
لا حرمني الله من طلتك
اخوك عمار الغزي

تحياتي لك اخي حيدر
منور صفحتي والله شكرا لك ولهذه العبارات
الغالية والجميله بحقي
لا حرمني الله من طلتك