كِسر كاسات صبره او عافني ابليل

او لفلفني الحزن گوّه ابعباته

ردِت دمعه .. وادوّر وين العيون ؟

اثاريهن بدوني امرافگاته

احس كلّي خويت ، او ذبلت الروح

مثل سمچه ابنهر نشفت لهاته

صِحت من لوعتي والليل مسموع

او رجع بس الصدى او حطني ابرحاته

وين اتريد ، يا عَز من الاعزاز ؟

او يا سلطان گلبي ، ويا اغاته

بعدك يا بشر يمليلي العيون

او منو المثلك حنين او طيبه ذاته

يمن گلبي اشتهاك او طلگ ّالكون

گبلك ناس سدت مشتهاته

يا ابيض گلب يتوضه بالنور

فرُض حُب الورد ما لحظه فاته

ما عندي سگف ، بس هيبتك بيت

غلات الدنيا ماتوصل غلاته

شفتك يوم نزفت حزن بغداد

ذهب بالنار مابدّل صفاته

صح احلامنه انباگت امن اسنين

او عمرنه انعصر وانشربت حلاته

تُرضه ابلايه حسّك اعبر الليل

او ترضه ابغير انفاسك اباته

اشيطفيّ نار قهرك من الضلوع

او تگلّب بالجمر چف الشماته

ذله الغربه ذله او انته حاشاك

تخدم اجنبي او تاكل فتاته

ارجع يمن طولك هيبة اعراگ

او طيبة دجلته او نخله او فراته
...................................

من روائع الشاعر رياض الركابي
تحياتي

وين اتريد ، يا عَز من الاعزاز ؟

او يا سلطان گلبي ، ويا اغاته

عاشت ايدج ام علاوي كلمات ولا اروع منها
احسنت الاختيار ويسلم الشاعر الركابي
مر من هنا
الفهداوي
تحياتي

حياك الله ام علاوي
وبارك الله فيك انت وشاعرنا الركابي
وشكرا" لحسن اختيارك
مميزه دومك في انتقاءاتك
دمت بحفظ الرحمن
تقبلي تحياتي
اخوك الامير

الفهداوي اسعدني مرورك العطر
لاعدمتك عزيزي
لك ودي

امير الامراء .. يسعدني وجود بصمتك بين سطوري
لاحرمت روعت مرورك عزيزي
لك تحياتي