المساعد الشخصي الرقمي

مشاهدة النسخة كاملة : اذا جرحك نزف



عراقي هواي وميزة فينا الهوى
28-11-2006, 08:44 AM
اذا جرحك نزف لاتشتكي الغير
تره الشكوى لغير الله ذله
واذا واحد ينشدك عن جرح بيك
حط بي صم ملــــــح بس لاتكله
كص السان جرحك و اخنك الآه
وشك زيج الوجع والآخ احمله
جلّب بالصبر لوجرح وازاك
خل هوّه يملك لاتمــــــــله
اخذ طبع الجبل لو وازته الريح
ما ينزل يبوس اجفوف تلـــــه
لاتقبل عسل وبذله من ناس
المراره بعز تراهه تصير احله
عوّد راحة ايدك تحضن السيف
وبالك لاتخلهه تصير طبله
وميّز بين ناسك واعرف الزين
موكلمن يمدلك جف تقبله
أكو زلمه بمهرته ايهد الجبال
واكو زلمه ظلم تنطيه حجله
وأكو جف صح تشوفه يشيل رطبات
لكن بس تكمشه يصير سِلـــه
أروي بماي عينك كاع الأصحاب
وحش راس الدغل بس كونه يعله
صحبانك صدك صيرلهم احزام
شد اظهورهم بالك تِفلـــــّه
وصيرلهم خناجر وكت الزماط
واذا خطار اجاهم صير دلـه
واذا صارو مظله اعليك فديوم
صيرلهم مظله اعله المظله
لتخلي الوراك يصير سِكّان
والكبالك ابد لتصير ظله
أمشي وخلي مايك يحفر الكاع
النهر لو وكف مايه يصير دِهــــله
خل روحك جذر واسكيهه بالطيب
حتى بطيب جذرك انته تعله
صحيح الجذر دومه يصير بالكاع
وصحيح الغصن دومه يصير اعلــــه
بس الشتله وشما عِلت ليفوك
بلايه اجذور ما تنحسب شتلـــــه

عراقي أصيل
28-11-2006, 01:31 PM
الله الله شعر جداً رائع
تسلم الأنامل أخوية ماجد


تحياتي


عراقي أصيل

عراقي هواي وميزة فينا الهوى
28-11-2006, 09:42 PM
عراقي اصيل

من ذوقك الرفيع
تقبل تحياتي

Iraqiruss
29-11-2006, 06:03 PM
خل روحك جذر واسكيهه بالطيب
حتى بطيب جذرك انته تعله
صحيح الجذر دومه يصير بالكاع
وصحيح الغصن دومه يصير اعلــــه
بس الشتله وشما عِلت ليفوك
بلايه اجذور ما تنحسب شتلـــــه

الله الله ...
عاشت الايادي والله ..
فعلا كلام رائع و صورة اروع ...
شكرا لك اخي
تحياتي لك

عراقي هواي وميزة فينا الهوى
30-11-2006, 11:57 AM
الله الله ...
عاشت الايادي والله ..
فعلا كلام رائع و صورة اروع ...
شكرا لك اخي
تحياتي لك[/QUOTE]

تحياتي وتقديري
على مروركم الدائم
وكلمات تكتبوها من القلب
الى
القلــــــــــــــب