تعال وشوف عيني اتجالع ابطاريك
مر بيها حلم بالليل واطرگهه



يالجيّتك عيد وصبحتك بوسات
وي طرت الفجر بخدودي تلصگهه



ورشنّك هلاهل صوت يخلف صوت
من تجبل على البيبان وتدگهه



واخيّطلك درب روحي التمشّى وياك
وادروب الشماته ابفرحتي افتگهه



واضويلك اعيوني اشما يمرّك ليل
واعلجلك العشره ابنار واحرگهه



واغنيلك اغاني الماطرت عل بال
واچفوفي اگبالك بل هوى اصفگهه



واعلمك ضيم روحي العلعلاها اجفاك
من گد ما مرض كل ساع يهدگهه



ي المتانيك ...وانته ابهزّة الكاروك
لا مو بالتجافي الروح ترشگهه



عيني ويه الدروب اتباري جيتك دوم
بحرثة جيّتك بسمار دگدگهه



او ونّاتي اعله شوفك ما تريد اتهيد
عبره اتروف بيها وعبره تخنگهه



گلايد للصدر صارتلك الذرعان
خل جيدك اليلو بشوگ يشبگهه



عطشان الدمع ضل ابيّابي العين
جفّت من لهيب احرورته ادرگهه



وچلمات اللسان اتخورست ياحيف
شح بيها الكلام وعيب تنطگهه



بعد ..ماضل صبر والصبر سيفه اغتاض
طبر هامة ايامي وعمده يفشگهه



بنيت ابچلّتي الفاتت علي چانون
ولفلفت ابغيابك روحي بخرگهه



يالصورّك بعيني انشلع بيها الشوف
بس صورة ( اجيتك ) گوم علّگهه



الك ورقة حياتي ويه العذيبي اتطير
خايف صيف هجرك لا يشگگهه



سامع بل يموت الروح منه اتروح
شو آنه الجسد للروح فارگهه



وابجبلة اعيونك مدداني الموت
ومشاهدي ابجيتك روحي تشهگهه



وضل اتنطّرك ..والحد گطوع النيط
والحد ما منيتي الموت يسبگهه








تحياتي لكم منقول :66 (6)::66 (46):


http://www5.0zz0.com/2009/09/23/13/122700829.jpg

http://www.iraqna1.com?كلمة ممنوعة??كلمة ممنوعة??كلمة ممنوعة?/imgcache/2/8489alsh3er.gif

الاخت العزيزه بلسم جميله جدا هذه القصيده كلها صور شاعريه رائعه
تسلمين ويسلم يراع الشاعر لو بس تعرفين اسمه
مشكور خيتي اختيار ينم عن ذوق جميل لك مني كل الود والاحترام
تقبلي تحياتي

سامع بل يموت الروح منه اتروح
شو آنه الجسد للروح فارگهه
................................
عزائي على نفسي ام على الزمان الذي لم ينصفني؟؟؟؟
وانا تشدني هذه المفردة اللطيفة بكل معانيها المرهفت الحس
نعم انها كوخزات الابر تغرز في فؤادي
لك خالص مودتي يابلسم الروح
بوركت لهذا الانتقاء ..وربي لا يحرمنا منك
اخوك الامير

شكرا على الموضوع الاكثر من مميز

تحياتي

الله الله روعة

كلمات في منتهى الروعة

تسلم الايادي

تقبلي مروري