المساعد الشخصي الرقمي

مشاهدة النسخة كاملة : خلصت ها ما خلصت خلصت ليالينا السود



عراقي هواي وميزة فينا الهوى
24-11-2006, 10:55 AM
السلام عليكم ورحمة الله وبركاته.
..............

عدّينة الليالي السود وگلنة خلصت وعـَدّت
وتمنينة ماتعود النوب .شو گبل منخـّلص الچلمات ردت
ايام من الالم والضيم وما صدگت الوادم من صدگ خـَلصت
من الجوع .من حرمان .
من ساعة يطب عليك حزبي ولن روحك أنخذت.
كيفنة الطاغية راح.وزمرته اشـعملت اسوّت
وگلنة الجاينة خير ومثلنة العالم أتأملت
ليش التأملناه طلع كل خير مابيه؟؟؟ وأكثر بعد احلامنة اسودت
....
زمان.زمان لمن دنانة الجوع شدينة اعلة البطون احزام وكل الوادم تحزمت
لأجل ما يكسر ضهرنة الجوع .وبينة اعوان الطاغية تشمت
وبيش يجود هالماعون خبز وماي لوخبز شعير كلشي الچان أكلت
و القائد المقدام مايرضيه ألا لحم غزلان أتعّطرت وتهيلت
عديناها وگلنة شدة تزول .وتفرج كلما اكثر اشتدت
ولابد يجي يوم وبيه نصيح فرجت.

تالي أجتك المنك وبيك وأول ما بدت بيك عضـّت
مارحمت توالي الروح وشلون عظامنة تكسرت
ومارحمت طعم مـُر سنين .وأكثر من المـُر النوب جـَرعَت
وأجمل حلم نحلم بيه من اجل هالدولار كتلت
....
صار الخبز عدنة هواي .بس الزلم بالبيت بطلت وگعدت
وصار الخير عدنة اكثر.بس گلي من هالخير العالم اشافت؟؟
وبعد الحزبي ما يجيك حتى تگول خلصت
كام الموت يمشي وياك أيد بأيد چن صحبان وتخاوت
ليمت يا عليم نگول فرجت؟؟
.........
أرد احچي وأدگ بالعظم حيل.لأن گالوا ما يفك اللحيم ألا كثرة الدگات
ولحيم عظامنة ظل أچم عظم بيه. من كثر الطغاة البيه دگت
وخلي ألي يلوم يلوم .و كلمن وي ضميرة أن صحة وان مات
مو من طبعي احچي عالغير لا والله.بس من ضيمي احچيها واحس رويحتي طگت.

قيادتنة والف عالخير بعد 1000 جلسة عشة گالوا أتفقت
بعد گعدات من السمچ مسگوف ومن التشريب ثردت وأكلت
ما ضل شي چم بند وچم موضوع والحكومة نگول كملت
أشكتبت؟؟ أشرسمت؟؟أشقسمت؟؟ اشسوت ؟؟
معلينة گلنة تهون .بس عساهة بالآخرة عالخير فـَضـَت
وفاتت تلث شهور وحكومتنة الرشيدة ابد ما بينت
هااااااااا بوية؟؟چا وين الحكومة وين؟؟و ين طارت وحطت ؟؟؟
بعدكم واحد يجر بالطول والاخر يشوف اسياده اشفصلت أشلبست؟؟
اواحد يفجر كوم من هالناس وبالآخر كلهة من هالتفجير تشوفهة تبـرّت
چا ياهو الطايح بينة كصب كصاب ؟وللتابوت أجساد ما ضـَلت
ياهو اليكتل بهل الناس ؟؟؟حتى يشوف القادة ضحكت. وأعلى المناصب تنصبت
أهي حچاية وگبل من سنين هم أنگالت
ترة كرسي الحكم بس خشبات .مو ذهبات وأنصاغت
ولو دوم الحـُكم بالكون چان الغيركم دامت
ومحد للموت اخذ وياه غير چفان ألة تفصلت
..........
وين العالم البيهم أتأملت؟؟
وين الضحت من أجلهم هالملايين وراحت انتخبت؟؟
وين الگالوا احنة هنا لون أرواحنا أتوذرت ؟؟
شوية صبر گالوا. وبعد 10 غدوات ونگللكم اتشكلت
.......
عمي گعدوا عشر سنين وأنعل أبو اليگللكم ليش طولت
بس كون الحكومة تصير گبل البشر ميخلصون وتالي نگول من البشر هالگاع فرغت
وگبل ما يوم القيامة يصير ومن اسامي الحكومة كلشي ماعرفت
وخوفي لايوم القيامة يصير ويسألونة. چا حكومتكم وين شو ما أجت ؟
عمي شنگلهم بعدهي ما تغدت ؟؟
.........
دفضوها الخاطر الله كافي صفنات
ترة حتى الصفنة من كثر صفناتكم ملت
واحدنة يمشي يسابگ الموت وگبل مانموت ارواحنه اتچفنت
وزِغـَيـّرنا بالبچي يـبات .من صور الاجساد التوذرت
والحسرة تحز بالروح أخاف أيام الطاغية بالالم قـَصرَت
دفضوها الخاطرالله وكافي لعبات وخل نگول فرجت.
خل نگول فرجت
<!-- / message --><!-- sig -->

Bint Belady
24-11-2006, 09:47 PM
إنها حرب وهدم وجحيم.. لا أمان ولا صفاء ولا سلام..
يا عراق يا امير الحضارات.. نخيلك مسلول,, ونفطك لعنه,, وابنك مقتول,, وللصبر طاقه..
وان شاء الله يصحو العراق موحداً وكل دخيل عن فراتيه يرحل والله يبعد عنك الفتنه يا اهل العراق.. كافي في كل بيت أمهات ثواكل..http://www.alforat.org/images/icons/icon9.gif

شكراً اخوي الفاضل ماجد.. دمت للأبداع عنواناً
مع خالص تحياتي وتقديري

عراقي هواي وميزة فينا الهوى
24-11-2006, 11:09 PM
ان شاء الله يخلص العراق من الارهاب والخونة والمجرمين القتلة




شكرا لمرورك الدائم

عراقي أصيل
29-11-2006, 10:44 PM
لا تسكت أعلة الجرح منين ليش تخاف
وتعيش مثل القطن وأنت بزمن نداف
وما طول مثل الجذع مدفون وأنت عدل
يا موووووووووووت منة أتخاف



مشكور أخوية ماجد وأحنا حال العراقيين بيد السياسين
صفوا أحنا صفينا ما صفوا لا والله منو يوكَع بيها غير الفقير
عمي والله كل شي ما نريد من يمهم بس خلي يجفونة شرهم
والله كريم ماكو طائفية تصير وخلينا نحلم والله سبحانه وتعالى ما يكَطع بعباده


مشكور مرة ثانية على الكلمات الجميلة


لكَ تحياتي


عراقي أصيل

عراقي هواي وميزة فينا الهوى
29-11-2006, 11:00 PM
عراقي اصيل

شكرا لمرورك الدائم
شكرا على شعورك واحساسك
تقبل تحياتي