فدرالي ورجل ألي ونزيف الليل
وصور من معركه بجف امس تذكارك

غشوك بحلم تتلاوه ويه الريح
شجاك ويه العواصف رحت تتعارك

اودوك لبحر بس بعطش رديت
تاخذ نفس كوه ماخذت ثارك

وكتبولك شعر هاياعراق الخير
كتلنه الجوع هسه اوينهه اشعارك

يصلبني الامل من يدوي بالخذلان
ويكتلني اليكلي أتفائل بنارك

يالدرعك كصب لاتعبر من النار
اذا ماتحترك تتهدم اسوارك

تاريخك نعم معقل وجود الكون
متكلي شجاك تهرب أثارك

بابل عالحدود وسومر بنص ليل
شفتهه بلامسله ابيت خطارك

موعود اليتم بيك المنايا تعيش
اسراب الجثث من لعنة أبارك

خيالك منو ياهو التجيبه يبيع
أول ماتأمنه يسوم بسوارك

وسوارك ذهب معلك جنائن ذوق
ماعلك نبوخذ جنته بدارك

انته الجنه لكن ماتشوف الناس
الا العاش بيك وعرف مقدارك

بعد اصبو لمن وانته بكرم زلزال
تهز الكاع بيك وتمطر ثمارك

يبو لسان الحلو تنكط شعر عالريك
وانغامك فؤاد أو وائلي حوارك

ساكن وي علي ومشاركه الحيطان
يطفه الكون كله وزاهيه انوارك

وانوارك حسين مجاور العباس
يذب جفوفه خاطر يبتدي اعمارك

والكاظم شعاع وحظره بيهه الجود
مايرجع فقير بطلبه لو زارك

تهب ريح الشمال بحظرة الموعود
علي الهادي وحسن عسكرلك اسرارك

أنه اعتب لأن مانستحق اليصير
مواقف حيل يمته شوكت نتدارك

صبرا ياعراق شكثر كلنه وياك
يصير الظيم عاف الظيم واختارك

صبرا ياعراق ارد احلم بأيوب
(لك الحمد مهما استطال البلاء )

ويفز سياب روحي هاعراق الخير
شوكت يمته الفرج حط عله لاعذارك

ايه خلصت اظن والشاعر بهم نام
يشهك بالهوه بس يزفر الياويل

ماكمل حلم فدرالي دك الباب
ورجل ألي ايتحكم في نزيف الليل

الاخ مهند والله ما ادري شكول قصيده تغنت بحب الوطن لا اقول الا اكثر من رائعه
بصراحه حاولت اقتبس منه كم بيت شفته كله جميله عاشت ايدك اخي الربيعي دوم الابداع والتميز يارب
دمت بخير وبارك الله بيك
وصبرا ياربيعي صبرا يعود الوطن الى حالته الطبيعيه باذن الله بوركت

يصلبني الامل من يدوي بالخذلان
ويكتلني اليكلي أتفائل بنارك



عاشت ايدك وصح لسانك ياشاعرنا
ننتظر جديدك دوما
تحياتي لك

صح لسانك عزيزي
وعاشت ايدك على هذا النغم الحزين الي غطى السطور
احساس بالحب والألم على الوطن

محروس الوطن بيكم يانشامة

الف شكر لك على هذا الإحساس الرائع

مع تحياتي لك

ماكو اغلى من الوطن

وما كو احد يستاهل ينكتب الة بس الوطن


تحياتي لكم

الاخ مهند والله ما ادري شكول قصيده تغنت بحب الوطن لا اقول الا اكثر من رائعه
بصراحه حاولت اقتبس منه كم بيت شفته كله جميله عاشت ايدك اخي الربيعي دوم الابداع والتميز يارب
دمت بخير وبارك الله بيك
وصبرا ياربيعي صبرا يعود الوطن الى حالته الطبيعيه باذن الله بوركت



ممنون منك اخي الغالي سلام الدراجي تحياتي واحترامي لك