ولاردت عليك الدنيه من مشيت
وحدك سافرت ياكلبي بالسكته

جنت عايش عمر متكبع بجف ياس
هسه بعمر قاحل تنتظر لفته

وليلك جان لوحه بنص مجرة شوك
هسه بلامجره غيوم ساجنته

الاوهام البكلبك سن حلك تمساح
واشباح الحقيقه تلبد بشفته

على اطراف السحب اتخايل انه الليل
يمد ايده اعله كلبي وياخذ وحشته

البستان النطرته شكد منافق جان
طرح للغير من شتال قدسته

صحيح انه انتهيت واسمي ماموجود
وماممكن سوالف ترجع بقصته

لكن نفترض ضرب المثل موعيب
بعد ممكن قضيه تطرح اسئلته

جم فزعه طلعت من عقل نص سكران
وجم صاحي وبخل للعدل مايفته

واذا صارت البوكه لساني هم ينباك
احجي بلاخجل واكشف شماكلته

دكتور ألي جانه سمم ألنه الناس
وبحقل التجارب طور اجهزته

اخترع بلبل يغني بحنجرة غربان
وانه بلاكلب هم جيت وسئلته

كال البلبل بصوته الضعف قد كان
من اول امس فختايه ماكلته

وطار البلبل وجنحه وكف بالريح
حنجرة الغراب القيدت اجنحته

وبين الاختلاف الجذري لمن طاح
وكبل لايحتضر رجعتله حنجرته

ماغرد صرخ ياظلم هالانسان
من هذا الطمع شنهي الي حققته

دمرت الطبيعه وخالفت الاعراف
انخدش جف الترافه بقبضة اسلحته

وبعد ياما شفت اشياء هم تنعاب
وغضيت النظر والصار ماكلته

لان عيب انستر من شاف هيج عيوب
وعيبك يازمان عيوبه عاجبته

ومشيت توحشت لكن بلايه انسان
ماردتلي دنيه ولا رجعت انته

رفضتني الحياة بأرضي شرد اختار
ولأن مرفوض عمري ... عمري طلكته

قدست العدم جي ينطي الك احساس
انك ميت وكل هذا ماعشته

وانك مو بشر لا من حجر منحوت
نعم ماينعرف بس مايذل كصته

كلهه اتعجبت جي عكس بالافكار
وحدك سافرت ياكلبي بالسكته

اوحدك موت صخره وبجبل مصفوط
متعرف جذوره ولاتحس قمته

انتهت واخر حقيقه بهالسطر شكيت
طلكت الحياه واحساسي يتمته

تسلم اخي على هذه القصيده الرائعه

دمت في هذا العطاء الراقي

تقبل مروري

تسلم اخي مهند لهذه القصيده الرائعه
بس اذا كانت منقوله رجاءا اكتب تحتها منقول للامانه الادبيه

تسلم اخي على هذه القصيده الرائعه

دمت في هذا العطاء الراقي

تقبل مروري


شكرا لك ياعراقيه مرورك منور الصفحه

تسلم اخي مهند لهذه القصيده الرائعه
بس اذا كانت منقوله رجاءا اكتب تحتها منقول للامانه الادبيه


شكرا لك اخي الغالي سلام الدراجي
اما عن القصيده فهي من كتاباتي
فأن كانت لغيري لكنت كتبت اسم كاتبها
فانا حريص مثلك على الامانه الادبيه
وللتأكد يمكنك البحث عن اسمي في المنتديات الاخرى
هذا ولك فائق الشكر والاحترام

شكرا لك عزيزي
ولهذه الكلمات اوالمفردات الجميلة

احساس داعب السطور
دام لنا هذا التميز
مع تحياتي لك

شكرا لك عزيزي
ولهذه الكلمات اوالمفردات الجميلة

احساس داعب السطور
دام لنا هذا التميز
مع تحياتي لك


الغاليه ام فيصل شكرا لهذا الاشراق المميز في المرور
تحياتي لك دمت بكل الخير والموفقيه