رسائلي لكل اعضاء المنتدى اخذت مني جهد كثير مبتغاي
ان ينظر الجميع الى قضية المهدي(ع) نظرة حظارية.......
والى كل من يتاجر بها سياسيين .مشايخ.شعراء.رواديـــد
لكل هولاء اقول
حرنه ويالسياسي شعنده آراء
عجيبه وبالثواني ايبدل الراي
حايطته عصابه تصوره باتمان
طاير بالسمه لو يمشي عالماي
عنده القوط صارت كل الانواع
نسه الباله شكثر جان الها شراي
ولسه بابي جف العوز مطبوع
وعن ظيم الدهر صايرله حمّاي
ومن هاجر لبره لهفتي اعليه
انشد على اخباره وشوكت جاي
واسولف بيه جان شكثر حباب
بجفوفه يجيني ويكطع ظماي
شمدريني تغير والدهر خلاه
شاذي ويالغريب وذيب وياي
سياسينه عجيب ومو بوجهين
بلاف الوجوه وضاع القياس
يبجي اعليتامه بالنهار ايلوع
ويتنكب الليل ويذبح الناس
وي طرة الفجر يشمرها عل الكاع
جثه بلا غطه تنشدني عل الراس
اي مفهوم هذا وشهني من راي
تتفرهد زلمنه وكلنه لاباس
ماعدنه فقط سلمناه بيد الحسين
ولو حكنه نوخذ كلنه وقف عل العباس
إشجار الحديد ايصير للزنجار
اذا تعبت الايد شينفع الفاس
تغير وسفه كلشي صار مكلوب
صار الجام عدنه يكطع الماس
ويعيش الكره والشوك والجلمود
ويموت العشك والورد والاحساس
الماعون ينضح بالذي فيه
ياعرك النذل للموت نداس
يخافك لان يدري بمهجتك عاشور
يدري بهطرتك من هطرة العباس
من تصهل الغيرة يفحط الخيال
وبهدة النخوة يتعب السيف
يالجناحك شمع للشمس لاتروح
خلّك عل الارض مخنوك بالحيف
ولان بيتك كصب والسكف من طين
معزب للمطر كل يوم الك ظيف
يعني بحيره انته وصعب تختار
لاينفعك شته ولا يرهمك الصيف
لاتحلم ابد حته الحلم ممنوع
سجين السهر يذبحلك الطيف
جوية كصتك والسبحه مترين
ولياليك حمر وبطرب وبكيف
لاتغتر مجاذيف العندك اهواي
الغركان شتنفعه المجاذيف
ولك شباج عينك خله مفتوح
احذر لاتغلكه وعني تندار
تتوجه اعله جلمه مصخت اهواي
مظرر!اريد احصيها الاظرار
لو كاتل نفس لو جان سلاب
لو كاسر محل لو بايك الجار
أّل باكك امس ياشعب يحميك
واقل مابيده صار اليوم مختار
وألّتظرر صدك لسه مخاوي العوز
متعلل بحوشه الخجل خطار
ماشفناه تصده وقاد الصفوف
ولا شفناه تشفه ويطلب الثار
لان طاهر حليبه ومهرته الجود
على صدره الوفه والطيب تذكار
مثل جف الطفوف اليخنك الخوف
من يومي تلبي بلهفه الانصار
اذا نمدت الظالم يوم بالذل
يحطها العمر كله بحلك منشار
اي مفهوم هذا وشنهي من راي
المصايبنه المصايب كامت تعد
رافجنه المنيه والمنيه بجوع
اذا فكت حلكها شلون ينسد
ماتشبع ابد لاعدها انصاف
تظل سيوفها بركابنه تحد
جن ألها يكلي الفرج عل الباب
بالمهدي تنخه حين تشتد
اليمنه اعله راسه من يمر طرواه
وبجيب البصفه اليسره تنمد
جف ايده الصفعني اليوم والله
مايبقه الاثرباجر يكصه الخد
تايخ حبل وصله ويه آل البيت
يكطعه شما حبلهم ليه ينشد
أيمانك بمهدي الامة قويه
بالايمان نار الحيره تخمد
آنه اعرف ظهوره من يعم الجور
تخذله انصارهخايف عنه ترتد
ملعون الشعر وكل اليكتبوه
واحدهم تكول معاشر المربد
وحطّب منبرك ذبه بلهاة النار
لان معبار ياهو الراد يصعد
اشكال النمايم كامت تذيع
وتحلف بالكريم الساعه كربت
علامه بوش الاعور نوبه شارون
عليه من الدوار عيونه حولت
نوبه باليمن بالنجف بالعشار
اشو كثره الاماكن جنها خبطت
دبسكم عيب موكافي خرافات
امس نضحك عليها اليوم ضحكت
نكثّر من الزنه والظلم والفرهود
مسلوله البعضنه سيوفنه ذبحت
ولكم عيب صارت حجه للجور
تبرير الافعال المن دمنه شربت
لوتحسب شكد انطوا علامات
اول ماتعدها تشوفها خلصت
علم الغيب موقن بيد باريك
من ياذن فقط الساعه هلت
والمهدي لو ظهر يعرفها للناس
ويعرف بالانصار الدونه ضحت
مسجلهم علي والحسن وحسين
ولساميهم الزهرة بفخر خطت
دخيلك يبو الزهرة ندري الذنوب
صحايفنه نعم بذنوبنا انترست
أشفع يبو الزهرة ياحبيب اللاه(الله)
تدري كلوبنه غيرك فلا حبت
خدام الحسين ونوفي للعباس
حناجرنه باسم المهدي اذا دوّت
xxxxxxxxxxx
اتمنى ان اكون قد وفقت في ايصال صوتي الىانوار الله في الارض(ع) ..وتحياتي لجميع الاعضاء ولكم الحرية في اختيار
مفردات ردودكم ولنبعد المجاملة....وفق الله الجميع..وختاما
لكم من فائق الشكر لمجرد القراءة ....
الشاعر نصير البزاز...عصو اتحاد الادباء الشعبيين
مسجل لديكم باسم ابني توفيق....مع اعتزازي
بالجميع
خادم اهل البيت
توفيــــــــــــــــــــــــــــــــــــــق

لك جزيل الشكر حبيبي توفيق
على روعه الطرح المقدم هنا
تقبل مروري المتواضع
مع ارق التحايا لك
واطيب امنياتي

احسنت
وصح لسانك عزيزي
جعلنا الله وإياكم من الثابتين على ولاية اهل بيت العصمة
ومن المجاهدين تحت راية قائم آل محمد

بارك الله فيك ولاحرمنا فيض هذا المداد المتألق دوما

مع تحياتي لك عزيزي

الاخ أبو كرار
اشكر مرورك الطيب وبارك الله بيك رسائلــــي هذه كنت اتمنى كل الاعضاء يقرؤنها لما نالتــه
من اهتمام هنا وفي بعض المواقع التـــــــــي طلبتها مني وقد تم نشرها ولا استطيع احصاء الردود التي جائتني....لكن ؟؟؟؟؟



توفيـــــــــق

الغالية....أم فيصل
شكرا لمرورك متمنيا ان تكوني قد تاملتي ولـو
قليلا ماكتبت...انه عصارت جهد وعـــــــذابات لا توصف....المهم لااريد ان اتشعب بالحــــــــديث
ولك ايضا اقول....ولكن؟؟؟؟؟؟؟؟؟؟



توفيـــــــــــــــق

اللهم صل على محمد وآل محمد
لا أشك أخي الكريم توفيق أن رسالتك قد وصلت الى مولاي روحي لمقدمه الفدا.. لأن ما يصدر عن قلب طاهر وروح تتأسى لما هال به عج يصله ويسعد قلبه الشريف ان شاء الله تعالى..رسالتك أخي الفاضل تستحق كل تقدير ليس لروعتها الأدبية فحسب فذاك شئ أكبر من أقيمه بما لدي من معلومات بسيطة عن الشعر والأدب، بل لجوهرها الفريد وأهمية ما تناولته من قضية..
لك مني كل تحية أخي الطيب توفيق وطيب الله أنفاسك..وتقبل مروري

عراقــــــــــــــــية.....
مرورك اثلج صدري وقد افتقدته في الايــــــام الخوالي..الشاعر اذا لايرصد الحالات الشـــاذة
التي يمر بها المجتمع فخير له ان يترك الشعر
واقوى هجمة يمر بها الان هي التجارة بقضية
امامنا ومولانا صاحب العصر والزمان.هذه الافة
بدات تستشري بين الناس واذا لم نكافحها كل
من موقعه فقد نكون ضحية لسخرية القدر....
اتمنى من الجميع المساهمة ...تقديري ورايك
الادبي يهمني ايضا...شكرا


توفيـــــــــــــق