السلام عليكم

اليوم عيد العمال العالمي
يعيده عليهم وعلينا
بشجم ورقة
مال لف تتن
مال ورق جرايد
مال دفتر مدرسي
مال ورقة رسم
الخير ومدة ايده
العمال من يومهم لليوم
باك يا سلمان باك
مكاريد
اذا اشتغلوا عد ابو البيت
يكفر بيهم يالله ينطيهم اليومية
اذا اشتغلوا بمعمل
يمردهم مرد ابو المعمل حتى يكنسون باب المعمل ويوم الخميس من يوزع الاسبوعية يتاخر فد ساعة على الاقل
والعامل الف تفكير يفكر
اشلون راح ايلحك على السيارات ويوصل لهله
والليلة جمعة بلكي يلحك على السوك ويشتريله
كيلو طماطة وشدة بصل اخضر وشجم كيلو من وحش الطاوة ايام زمان
وعلى هذا التفكير
يطل عليهم صاحب المعمل
وكرشه مترين ليكدام
اسف للتاخير
هاي نص اسبوعية
والباقي على الاسبوع الي يجي
علمود يضمن بقائهم عنده اسبوع اخر للاستغلال
هسه معانات العمال اهواي يراد ايام وليالي
علمود نوصف نقطة من بحر الامهم
اليوم
وفي ضل التحول الجديد
مو تحويلة مؤقته
ولا تحويلة من بيت لبيت
تحويلة من نظام الى نظام
شنطت هاي الحكومة للعمال
هم سمعتم فد قرار للعمال
بالسنين الي راحت
يجوز واني ما اعرف
بس اعتقد
اعتقد انطوهم
اكرامية
ياعمال العالم اتحدوا
على شنو يتحدون
الله اعلم

مبدع كما عهدناك اخي العزيز ابو كاطع

ومواضيعك تصب في وسط الصميم

والله العامل شيريد يحجي وشيريد يكول

جابه من هذاك اليوم لليوم يركض والعشه خباز

يعني الي عنده 5 اطفال وكاعد بالايجار

ما يلتفتون اهل الكروش ويكولون هذا خطيه

خل ننطيه راتب ننطيه بيت يكعد بيه


الى متى يركض وره الطماطه وحتا الطماطيه تكبرت علينه وصايره نار

خو اللحم العامل يندعي بلكت واحد يموت بالفرع من جيرناهم

حتا ياكله لحمه بالفاتحه

ماكو اللحم صار عمله نادره بالعراق

والعراقيين من أكل الفخاذ مال الدجاج طكتلهم افخاذ زايده


بالله شلون يتحمل هذا العامل المسكين والى متى يااهل الكروش

ما انترست اكروشكم من تنترس كروشكم خابروني حتا اكللكم سم وزقنبوت مو تنسون انتظر الاتصال


مع تحياتي ويريدون العمال يتحدون على شنو على اصخام وجوهكم

فئة العمال على الرغم من انهم قاعدة للبناء والتطوير في اي بلد
الا انهم دائما من الفئة المستضعفة قياسا لباقي الشرائح -- وخصوصا فئة الكسبة
وهذا الوضع قائم ليس في العراق فقط بل في جميع الدول العربية والإسلامية
ندعــوا الله ان يصحوا اصحاب المقام الرفيع ويشعروا بمعاناة من لولاهم لما قامت البلاد
وفكروا في تحقيق مطالبهم وحفظ حقوقهم على الأقل


(( وتفــــــــــــــرج يـــــــــاعــــــراق ))


تحياتي لك عزيزي ابو كاطع