كضيت العمر روحي بحماد الصيف
اتوسد جروحي وكــثرة ظنوني
تيممت التراب واشرب من العين
عيني الزاعلنهه بنومهه جفوني
جرحي بطول عمري وفصليته فصال
واضمدهه الجروح شما يلجموني
عكازة الغربه هواي غرت ناس
ومن حظي العثر عالسفر وزوني
بعت بدلة زفافي وحلقة النيشان
ويوم السافرت غر كـان بـديـوني
توسدت الرصيف وبالسمه تغطيت
وانه البالفرو جــانـو يــغطـونـي
وانه ابن المضيف المايرد خطار
حد بالــروح اعــزب لليضيفوني
مامديت اديه وهاي اديه شهود
غلطو بالقياس بيوم قاسـونــي
باجر لومتت منهو التشك الزيج
وماعدهم فرات وبــيه يغسلوني
وماعدهم شفيع ومنهو مثل حسين
ولاعباس عدهم ليه يزوروني
اوين الكي ربع ترثيني بالهوسات
ويزفني التفك يــوم اليشيعوني
ليه البالوطن تسوه الغرب والبيه
ولاغرني اللكيــته وبيه يقنعوني
وليله البالوطن تسوه العمر والبيه
واذا اني عـفـت لا مايعيفوني
وظلمة غرفتي تسوه الضوه بالكون
والا لــه التدخن كحلـه لعيوني
.................................................. .....................


الغربه بروحي تاكل ماانام الليل
ولايمي ربع عالــهم يـصبروني
اذكر وليدي وكعدت امي هناك
واغرك بالحنين وتــهـمـل عيوني
هلــي وكاعي ومضيفي وكبة العباس
عيون على الدرب كالساه ينطروني
يندهني الفرات وعنبر المشخاب
ومسحاتي تحن مشتاكه لمــتونــي
اشد حيـلي واردن مااظل هنا
وباجر بالعراق الــصـبح يلكوني
اجوعن بالعراق واكل من الكاع
واظل جلد وعظم بــس ما يـذلوني
.................................................. ........................


دور جنطتي تلكه العراق وياي
الغيره البراسي وبس يحشموني
ماارضه الوطن منهوب وانه هنا
واترجه الغرب بلكت يجنسوني
ضيعت العمر من سافرت للظيم
ولااكثر يصير الشافته عيــوني
صوت امي ندهني وثار اخوي يصيح
شبت نار غيضي شيطفي جانوني
تابوتي على راسي وافتر على الموت
انخطف لون المنايا وماخطف لوني
مناير علي صوتي والجهاد اوذان
ذو الفقار انـــه ومــايـثــلــمــونـي
وانه البشدايد اشك صدر الليل
وابــن حــيدر عــلـي لـساه يسموني
علمني الحسين اشلون اضحي الروح
واهــز الـكاع يــوم ادخــن امتوني


بقلم المبدع الشاعر العراقي
جواد الكلابي

دمتم سالمين باذن الله

وليله البالوطن تسوه العمر والبيه
واذا اني عـفـت لا مايعيفوني
وظلمة غرفتي تسوه الضوه بالكون
والا لــه التدخن كحلـه لعيوني

هذا هو العراقي
هذا هو ابن الأرض الطاهرة
الغربة سكين في الخاصرة كلما اتجهت الى جانب
تحركت واشعلت الشوق والألم

شكرا لك عزيزتي العراقية
وصح لسانج قصيدة رائعة وحزينه تسطر الم الغربة
اللهم رد كل غريب الى وطنه سالما غانما

تحياتي

اجوعن بالعراق واكل من الكاع
واظل جلد وعظم بــس ما يـذلوني
ربى يسعد ايامك أ. العراقية
سيدتى
اعز الله اهل العراق والى يريدن بهم سوءربى يذله
بارك الله بك على حسن اختيارك
تحياتى واحتراماتى

يسلموو عيووني على ها القصيده الرائعه
وشكرا على ها النقل المميز
دمتي بود

شكرا على مروركم
وردودكم الكريمه
تحياتي واحترامي
في امان الله

الاخت الغالية عراقية
قصيدة رائعة بروعة روحك الشفافة
واحييك لامانتك الادبية وكتابة كلمة منقول
تقبلي مروري مع باقة ورد

شكرا على مرورك اخي
تحياتي واحترامي
في امان الله

السلام عليكم

الاخت العراقيه الغاليه

شكرا لك على هذه الامانه الادبيه

وقد اسعدني ان ارى قصيدتي منقوله

بهذا المنتدى الرائع والذي يحمل اسم الفرات

العذب وكل مااراه هنا هو طيبكم وعذوبتكم

وحبكم الكبير للعراق

لك مني كل الحب والاعتزاز

الشاعر جواد الكلابي

رئيس الاتحاد العام للادباء الشعبين

فرع النجف

وعليكم السلام ورحمة الله وبركاته
اخي الكريم
اسعدني تواجدكم
ومثل هذه القصائد الرائعه المؤثره تستحق النشر
وكان لي الشرف الكبير ان اضعها في منتدى الفرات
بارك الله بيكم
وفقكم لخير الدنيا والاخره ان شاء الله
دمتم في حفظ الرحمن